حیدر آباد: بی آئی ایس پی کی مستحق خواتین سے فی قسط 2 ہزار روپے کاٹنے والے 8 ڈیوائس ہولڈرز گرفتار

حیدرآباد(جانوڈاٹ پی کے)حیدرآباد میں بینظیر انکم سپورٹ پروگرام کی مستحق خواتین سے فی قسط 2 ہزار روپے کاٹنے والے 8 ڈیوائس ہولڈرز گرفتار کرلیے گئے۔

وفاقی تحقیقاتی ادارے (ایف آئی اے) نے حیدرآباد کے علاقے لطیف آباد کے بی آئی ایس پی سینٹر پر کارروائی کی جہاں ڈیوائس ہولڈر بی آئی ایس پی کی مستحق خواتین کی فی قسط سے 1500 سے 2000 روپے تک غیر قانونی طور  پر کاٹ رہے تھے۔

ایف آئی اے حکام کا بتانا ہے کہ کارروائی کے دوران 8 ڈیوائس ہولڈرز کو گرفتار کرکے بائیو میٹرک ڈیوائسز اور 13 لاکھ 86 روپے  سے زائد کی رقم سمیت  اہم ریکارڈ برآمد کرکے قبضے میں لیا گیا۔

 ایف آئی اے حکام کے مطابق گرفتار ملزمان کے خلاف مقدمہ درج کرلیا گیا ہے جن کی نشاندہی پر مزید ملزمان کے خلاف کارروائی کی جارہی ہے۔