سپریم لیڈرعلی خامنہ ای اور شہدا کے خون کا بدلہ مناسب وقت پر لیا جائے گا،ایران کا اعلان
تہران(جانوڈاٹ پی کے)ایران کی سپریم نیشنل سکیورٹی کونسل نے اعلان کیا ہے کہ شہید سپریم لیڈر سید علی خامنہ ای اور ایرانی عوام کے خلاف جرائم کے مرتکب عناصر کو مناسب وقت پر سزا دی جائے گی۔
ایرانی میڈیا کے مطابق ایران کی سپریم نیشنل سکیورٹی کونسل کے سیکرٹری محمد باقر ذوالقدر نے بدھ کو جاری بیان میں کہا کہ ’شہید قائد کی شہادت کے وقت بند مٹھی ایران کے قومی سلامتی نظریے کی ایک دائمی علامت رہے گی‘۔
خیال رہے کہ ایران کے نئے سپریم لیڈر مجتبیٰ خامنہ ای نے اپنے پہلے بیان میں کہاتھا کہ انہوں نے اپنے والد کی وفات کے بعد ان کا جسد خاکی دیکھا، جس میں ان کی مٹھی بند تھی جو مزاحمت کی آخری علامت تھی۔
محمد باقر ذوالقدر نے کہا خامنہ ای اور ایران کے مظلوم شہدا کے خون کا بدلہ لینے کا معاملہ ابھی انجام کو نہیں پہنچا۔
ان کا کہنا تھا ان جرائم کے مرتکب اور احکامات دینے والے عناصر کو بہت جلد، مناسب وقت پر ان کے انجام تک پہنچایا جائے گا۔
