پاکستان میں نیپا وائرس کے ممکنہ پھیلاؤ کے پیش نظر الرٹ جاری

اسلام آباد (جانوڈاٹ پی کے)پاکستان میں نیپا وائرس کے ممکنہ پھیلاؤ کے پیش نظر وفاقی حکومت نے الرٹ جاری کر دیا ہے اور حفاظتی اقدامات کو مزید سخت کر دیا ہے۔ بھارت میں وائرس کے بڑھتے ہوئے کیسز کے بعد حکومت نے تمام داخلی راستوں پر مکمل سکریننگ لازمی قرار دی ہے۔

بارڈر ہیلتھ سروسز پاکستان کے مطابق یہ اقدام عالمی ادارہ صحت (WHO) کی رپورٹ کے بعد اٹھایا گیا ہے۔ انٹرنیشنل ائیر پورٹس، بندرگاہوں اور زمینی سرحدوں پر 100 فیصد سکریننگ کی ہدایات جاری کی گئی ہیں، جس کے تحت تمام مسافروں، عملے اور ڈرائیورز کی مکمل جانچ کی جائے گی۔ کسی بھی فرد کو بارڈر ہیلتھ سروسز کی ہیلتھ کلیئرنس کے بغیر ملک میں داخلے کی اجازت نہیں ہوگی۔

ایڈوائزری میں تمام مسافروں کی گزشتہ 21 دن کی مکمل سفری اور ٹرانزٹ ہسٹری کی تصدیق لازمی قرار دی گئی ہے۔ نیپا وائرس سے متاثرہ علاقوں سے آنے یا گزرنے والے افراد کی خصوصی نگرانی کی ہدایت بھی کی گئی ہے۔

تمام پوائنٹس آف انٹری پر تھرمل اسکریننگ اور طبی معائنہ لازمی ہوگا، اور کسی بھی مسافر میں بخار یا دیگر علامات ظاہر ہونے پر فوری کارروائی کی جائے گی۔ نیپا وائرس کی علامات میں بخار، سر درد، سانس کی تکلیف اور اعصابی علامات شامل ہیں، اور مشتبہ مریض کو فوراً آئسولیٹ کر کے متعلقہ اداروں کو رپورٹ کرنے کی ہدایات دی گئی ہیں۔

حکام نے اس کے علاوہ سفری معلومات چھپانے یا غلط بیانی کرنے والوں کے خلاف قانونی کارروائی کی بھی سفارش کی ہے تاکہ وائرس کے ممکنہ پھیلاؤ کو مؤثر طریقے سے روکا جا سکے۔