پاکستان سٹاک ایکسچینج میں ریکارڈ اضافہ، ہنڈرڈ انڈیکس پہلی بار 190 ہزار پوائنٹس کی حد عبور کر گیا

کراچی (جانوڈاٹ پی کے)پاکستان سٹاک ایکسچینج میں مثبت رجحان کے باعث ریکارڈ توڑ اضافہ جاری ہے۔ کاروباری ہفتے کے پہلے روز کاروبار کے آغاز پر زبردست تیزی دیکھنے میں آئی، جس کے نتیجے میں ہنڈرڈ انڈیکس ایک لاکھ 90 ہزار پوائنٹس کی سطح عبور کر گیا۔

کاروبار کے دوران ہنڈرڈ انڈیکس ایک لاکھ 90 ہزار 658 پوائنٹس کی بلند ترین سطح پر پہنچ گیا، جس نے سرمایہ کاروں میں اعتماد کی فضا پیدا کی ہے۔

واضح رہے کہ گزشتہ کاروباری ہفتے کے اختتام پر بھی سٹاک مارکیٹ میں مثبت رجحان رہا تھا اور ہنڈرڈ انڈیکس 1478 پوائنٹس اضافے کے ساتھ ایک لاکھ 89 ہزار 166 پوائنٹس کی سطح پر بند ہوا تھا، جس کے بعد یہ مارکیٹ مسلسل اوپر کی جانب بڑھتی دکھائی دے رہی ہے۔

ماہرین کا کہنا ہے کہ مارکیٹ میں اتار چڑھاؤ کے باوجود حالیہ مثبت رجحان سرمایہ کاری کے لیے حوصلہ افزا ہے اور ملکی معیشت میں بہتری کے آثار ظاہر کر رہا ہے۔