نیٹو سے متعلق بیان پر امریکا کی وضاحت، برطانیہ کی تنقید مسترد

واشنگٹن (جانوڈاٹ پی کے) امریکی صدر ڈونلڈ ٹرمپ کی انتظامیہ نے نیٹو سے متعلق صدر کے بیان پر برطانیہ کی جانب سے کی جانے والی تنقید کو مسترد کر دیا ہے۔

وائٹ ہاؤس کی جانب سے جاری بیان میں کہا گیا ہے کہ صدر ٹرمپ درست کہتے ہیں اور نیٹو کے لیے امریکا نے سب سے زیادہ قربانیاں دی ہیں۔ بیان کے مطابق امریکا نے نیٹو کے لیے دیگر اتحادی ممالک کے مقابلے میں زیادہ کردار ادا کیا اور بھاری ذمہ داریاں نبھائیں۔

خیال رہے کہ صدر ڈونلڈ ٹرمپ نے اپنے ایک بیان میں نیٹو کے اتحادی ممالک پر تنقید کرتے ہوئے کہا تھا کہ افغانستان میں طالبان کے خلاف جنگ کے دوران نیٹو کے غیر امریکی فوجی محاذِ جنگ سے پیچھے رہے اور فرنٹ لائن پر موجود نہیں تھے۔

امریکی صدر کے اس بیان پر ردعمل دیتے ہوئے برطانیہ کے وزیراعظم سر کیئر اسٹارمر نے افغانستان میں برطانیہ سمیت نیٹو افواج کے کردار سے متعلق ٹرمپ کے بیان کو مضحکہ خیز، خطرناک اور توہین آمیز قرار دیتے ہوئے معافی مانگنے کا مطالبہ کیا تھا۔

دوسری جانب کنزرویٹو پارٹی کی رہنما کیمی بیڈینوک نے بھی امریکی صدر کے بیان کو ’’فضول بکواس‘‘ قرار دیا، جبکہ امریکا میں مقیم برطانیہ کے شہزادہ ہیری نے کہا کہ افغانستان میں نیٹو افواج کی جانب سے دی جانے والی قربانیوں کا احترام کیا جانا چاہیے۔