امریکا: وینزویلا پر کارروائی کے خلاف احتجاج کے دوران خاتون گرفتار، ویڈیو وائرل
مشی گن (مانیٹرنگ ڈیسک)امریکی صدر ڈونلڈ ٹرمپ کی وینزویلا میں کی گئی فوجی کارروائی کے خلاف احتجاج کے دوران ایک خاتون کو لائیو ٹی وی انٹرویو کے فوراً بعد گرفتار کر لیا گیا۔
واقعہ مشی گن کے شہر گرینڈ ریپڈز میں پیش آیا، جہاں پولیس نے مظاہرین کے خلاف کارروائی کرتے ہوئے جیسیکا پلیچٹا کو حراست میں لیا۔ جیسیکا پلیچٹا ایک مقامی ٹی وی چینل کو انٹرویو دے رہی تھیں اور وینزویلا کے صدر نکولس مادورو کی گرفتاری پر تنقید کر رہی تھیں۔ ان کا کہنا تھا کہ یہ صرف خارجہ پالیسی کا معاملہ نہیں بلکہ امریکی ٹیکس دہندگان کے پیسے مبینہ جنگی جرائم میں استعمال ہو رہے ہیں۔
انٹرویو ختم ہونے کے فوراً بعد پولیس اہلکار پیچھے سے آئے اور خاتون کو ہتھکڑیاں لگا کر حراست میں لے لیا۔ پولیس نے بتایا کہ خاتون پر سڑک بلاک کرنے اور قانونی احکامات نہ ماننے کا الزام تھا۔ پولیس کا کہنا ہے کہ مظاہرین کو کئی بار سڑک چھوڑ کر فٹ پاتھ پر منتقل ہونے کی ہدایات دی گئیں، لیکن وہ اس پر عمل نہ کر سکیں۔
بعد ازاں جیسیکا پلیچٹا کو کچھ وقت بعد رہا کر دیا گیا، جس کے بعد انہوں نے احتجاج کے دوران نعرہ لگایا: "ویوا مادورو” یعنی "مادورو زندہ باد”۔
یہ احتجاج امریکا کے مختلف شہروں میں ہونے والے مظاہروں کا حصہ تھا، جہاں ٹرمپ انتظامیہ کے وینزویلا کے خلاف فیصلوں کے خلاف عوام نے اپنی آواز بلند کی۔
