وزیرآباد،سوئی ناردرن گیس دفتر میں یو پی ایس اور جنریٹر نہ ہونے کی وجہ سے شہریوں کو شدید مشکلات

وزیرآباد (جانوڈاٹ پی کے) سوئی ناردرن گیس پائپ لائنز لمیٹڈ (ایس این جی پی ایل) کے وزیرآباد دفتر میں یو پی ایس اور جنریٹر جیسی بنیادی سہولیات نہ ہونے کے باعث شہریوں کو شدید مشکلات کا سامنا ہے، شہر میں جب بھی بجلی بند یا مینٹیننس پرمٹ کے باعث لوڈشیڈنگ ہوتی ہے تو دفتر کا کمپیوٹرائزڈ اور دفتری نظام مکمل طور پر رک جاتا ہے جس سے صارفین کے کنکشن، بلنگ، شکایات اور دیگر امور التوا کا شکار ہو جاتے ہیں، مناسب اسٹینڈ بائی سہولت نہ ہونے کی وجہ سے عملہ بھی مؤثر انداز میں کام نہیں کر پاتا اور صارفین کو اگلے دن آنے کا کہہ دیا جاتا ہے جس سے دور دراز سے آنے والے شہریوں کا وقت اور پیسہ ضائع ہوتا ہے۔ اس صورتحال پر انجمن تحفظ حقوق شہریوں کے صدر افتخار احمد بٹ سمیت سماجی و سیاسی شخصیات انجینئر نعیم قیصر نجمی، صابر حسین بٹ اور افتخار محمود صدیقی نے مشترکہ طور پر محکمہ سوئی گیس کے اعلیٰ حکام سے مطالبہ کیا ہے کہ وزیرآباد دفتر میں فوری طور پر متبادل بجلی کا انتظام کیا جائے تاکہ بجلی کی بندش کے باوجود دفتری امور بلا تعطل جاری رہ سکیں، ان کا کہنا تھا کہ یو پی ایس اور جنریٹر کی فراہمی سے صارفین کو بروقت سہولت میسر آئے گی اور انہیں دفتر کے غیر ضروری چکر نہیں لگانا پڑیں گے، شہریوں نے بھی اعلیٰ حکام سے اپیل کی ہے کہ اس اہم مسئلے کا فوری نوٹس لے کر عملی اقدامات کیے جائیں تاکہ عوام کو مزید مشکلات سے بچایا جا سکے۔