ہیڈ کوچ اظہر محمود نے بابراعظم کو ڈومیسٹک کرکٹ کھیلنے کا مشورہ دیدیا

راولپنڈی(جانوڈاٹ پی کے)پاکستان کی ریڈ بال ٹیم کے ہیڈ کوچ اظہر محمود نے  بابر اعظم کو ڈومیسٹک کرکٹ  کھیلنے کا مشورہ دے دیا۔

ہیڈ کوچ اظہر محمود نے جمعرات کو  جنوبی افریقا کے ہاتھوں  دوسرے ٹیسٹ میں 8 وکٹوں سے شکست کے بعد کہا کہ بابر اعظم کا فرسٹ کلاس کا تجربہ کم ہے اور انہیں مشورہ دیا کہ وہ ٹیسٹ کرکٹ کے دباؤ سے ہم آہنگ ہونے کے لیے مزید ڈومیسٹک کرکٹ کھیلیں۔

اظہر محمود نے راولپنڈی کرکٹ اسٹیڈیم میں پریس کانفرنس کے دوران کہا کہ قومی ٹیم کے کئی کھلاڑیوں کا فرسٹ کلاس کرکٹ کا تجربہ کم ہے۔

سابق آل راؤنڈر نے کہا کہ کھلاڑی باقاعدگی سے ڈومیسٹک کرکٹ کھیل کر ہی پریشر برداشت کرنے کا ہنر سیکھ سکتے ہیں۔

اظہر محمود نے کہا کہ اگر آپ ہمارے کھلاڑیوں کو دیکھیں، جیسے بابر اعظم  یا عبداللہ شفیق، دونوں نے زیادہ فرسٹ کلاس کرکٹ نہیں کھیلی۔ عبداللہ نے چند میچز کھیلے ہیں اور بابر نے بھی زیادہ فرسٹ کلاس یا ٹیسٹ کرکٹ نہیں کھیلی۔

انہوں نے کہا کہ جب آپ  ڈومیسٹک کرکٹ کھیلتے ہیں تو آپ سیکھتے ہیں کہ پریشر کو کیسے سنبھالنا ہے۔ پھر جب آپ انٹرنیشنل کرکٹ میں آتے ہیں تو بہتر کارکردگی دکھاتے ہیں۔اگر آپ ناکام بھی ہو جائیں تو آپ کو معلوم ہوتا ہے کہ واپسی کیسے کرنی ہے۔ میرے خیال میں ڈومیسٹک کرکٹ ہی بہترین حل ہے۔

اظہر محمود نے مزید کہا کہ پاکستان کو اسپنرز کے خلاف اچھی بیٹنگ کرنا سیکھنا ہوگی، ڈومیسٹک کرکٹ میں بھی اسپنرز کے لیے  سازگار پچز  بنانی پڑیں گی، انٹرنیشنل کرکٹ میں دماغی طور پر مضبوط ہونا چاہیے۔

یاد رہے کہ  راولپنڈی ٹیسٹ میں جنوبی افریقا نے باآسانی پاکستان کو 8 وکٹوں سے شکست دے کر سیریز 1-1 سے برابر کر دی۔