سحر ہاشمی کا پروڈیوسرز کے رویے پر سوال، فنکاروں کے معاوضوں میں تاخیر کا معاملہ اٹھا دیا

کراچی (ویب ڈیسک) پاکستانی اداکارہ سحر ہاشمی نے ڈرامہ انڈسٹری میں فنکاروں کو درپیش مسائل پر آواز اٹھاتے ہوئے پروڈیوسرز کے غیر پیشہ ورانہ رویے اور معاوضوں کی ادائیگی میں تاخیر پر سوالات اٹھا دیے۔

ڈرامہ سیریل ’ظلم‘ سے اداکاری کا آغاز کرنے والی سحر ہاشمی نے گزشتہ دو سے تین برسوں کے دوران شوبز انڈسٹری میں اپنی پہچان بنائی ہے۔ ڈرامہ ’شیدائی‘ میں کامیابی کے بعد انہیں خاصی پذیرائی ملی، جبکہ ڈرامہ ’زنجیریں‘ میں شہر بانو کے کردار نے بھی انہیں مداحوں میں مقبولیت دلائی۔

اداکارہ جلد ڈرامہ سیریل ’درِ نجات‘ میں خوش بخت کے نوجوان کردار میں دکھائی دیں گی۔

سحر ہاشمی نے انسٹاگرام اسٹوری کے ذریعے فنکاروں کو معاوضوں کی ادائیگی میں تاخیر کا معاملہ اٹھایا۔ ان کا کہنا تھا کہ اگر کوئی فنکار ایک دن تاخیر سے پہنچے تو اسے غیر پیشہ ور قرار دے دیا جاتا ہے، لیکن جب فنکاروں کی ادائیگیاں مہینوں تک روک لی جائیں تو اسے اکاؤنٹس کا مسئلہ قرار دے کر ٹال دیا جاتا ہے۔

اداکارہ کے اس بیان نے شوبز انڈسٹری میں فنکاروں کے حقوق، بروقت معاوضوں کی ادائیگی اور پروڈیوسرز کی پیشہ ورانہ ذمہ داریوں سے متعلق بحث کو دوبارہ نمایاں کر دیا ہے۔