وزیر اعلیٰ سہیل آفریدی ، سپیکر بابر سلیم سواتی، جنید اکبر سمیت دیگر رہنما گرفتار
پشاور (جانوڈاٹ پی کے) خیبرپختونخوا میں ایمرجنسی اور گورنر راج کے نفاذ کے بعد وزیراعلیٰ سہیل آفریدی، پی ٹی آئی کے صوبائی صدر جنید اکبر اور صوبائی اسمبلی کے اسپیکر بابر سلیم سواتی کو گرفتار کیے جانے کی اطلاعات سامنے آئی ہیں۔
رپورٹ کے مطابق جنید اکبر نے سوشل میڈیا پر اپنے پیغام میں وزیراعلیٰ سہیل آفریدی اور اپنی گرفتاری کی تصدیق کی، جبکہ اسپیکر صوبائی اسمبلی بابر سلیم سواتی کی گرفتاری کا دعویٰ بھی کیا گیا ہے۔ تاہم ان گرفتاریوں کی مکمل تفصیلات اور سرکاری حکام کا باضابطہ مؤقف سامنے آنا باقی ہے۔
دوسری جانب پی ٹی آئی رہنما شاہد خٹک نے سماجی رابطے کی ویب سائٹ ایکس پر اپنے پیغام میں جنوبی اضلاع، خصوصاً کرک کے عوام سے اپیل کی کہ وہ قومی شاہراہ بند کرکے پشاور کی جانب رخ کریں۔ ان کے اس پیغام کے بعد صوبے میں سیاسی صورتحال مزید کشیدہ ہونے کا خدشہ ظاہر کیا جا رہا ہے۔
ذرائع کے مطابق ایمرجنسی اور گورنر راج کے نفاذ کے بعد وزیراعلیٰ سہیل آفریدی سے ملاقاتوں پر پابندی عائد کر دی گئی تھی، جبکہ وزیراعلیٰ ہاؤس میں داخلے اور عملے کی سرگرمیوں کو بھی محدود کیے جانے کی اطلاعات ہیں۔
ادھر وفاقی حکومت نے سینئر بیوروکریٹ ڈاکٹر محمد فخر عالم عرفان کو چیف سیکریٹری خیبرپختونخوا تعینات کر دیا ہے، جس کا نوٹیفکیشن جاری ہونے کی اطلاع ہے۔
خیبرپختونخوا میں حالیہ انتظامی اقدامات اور گرفتاریوں سے متعلق دعووں کے بعد سیاسی صورتحال پر گہری نظر رکھی جا رہی ہے۔ متعلقہ حکام کی جانب سے باضابطہ تفصیلات سامنے آنے کے بعد صورتحال مزید واضح ہو سکے گی۔
