نیشنل ٹیکنالوجی پارک پاکستان میں آئی ٹی کے فروغ کا سنگِ میل ثابت ہوگا، وزیراعظم

اسلام آباد(جانوڈاٹ پی کے) وزیراعظم شہباز شریف نے کہا ہے کہ نیشنل ٹیکنالوجی پارک پاکستان میں انفارمیشن ٹیکنالوجی اور مصنوعی ذہانت کے فروغ، نوجوانوں کو جدید ہنر سکھانے اور ملک کو ترقی یافتہ ممالک کی صف میں شامل کرنے کے لیے سنگِ میل ثابت ہوگا۔ منصوبے کے ذریعے لاکھوں نوجوانوں، بالخصوص خواتین، کو بااختیار بنانے کے نئے مواقع فراہم کیے جائیں گے۔

اسلام آباد میں نیشنل ٹیکنالوجی پارک کی افتتاحی تقریب سے خطاب کرتے ہوئے وزیراعظم نے کہا کہ یہ منصوبہ جدید تقاضوں کے مطابق تعمیر کیا گیا ہے، جہاں انکیوبیشن سینٹرز، اختراعی سرگرمیوں اور نئے کاروبار شروع کرنے والے نوجوانوں کے لیے مختلف سہولیات دستیاب ہوں گی۔ اس کے علاوہ طلبہ اور اساتذہ بھی ان مواقع سے فائدہ اٹھا سکیں گے۔

شہباز شریف کا کہنا تھا کہ جدید ٹیکنالوجی میں مہارت حاصل کرکے نوجوان پاکستان کی معاشی ترقی میں اہم کردار ادا کر سکتے ہیں۔ نیشنل ٹیکنالوجی پارک مکمل طور پر فعال ہونے کے بعد ملک کے چاروں صوبوں میں اسی نوعیت کے مزید ٹیکنالوجی پارکس قائم کرنے کی راہ بھی ہموار ہوگی۔

وزیراعظم نے کہا کہ مصنوعی ذہانت اور انفارمیشن ٹیکنالوجی سے زراعت، صنعت، مینوفیکچرنگ، معدنیات اور حکومتی شعبوں سمیت مختلف میدانوں میں استفادہ کیا جا سکتا ہے۔ جدید ٹیکنالوجی کا مؤثر استعمال ملکی معیشت کو آگے بڑھانے اور نوجوانوں کے لیے روزگار و کاروبار کے نئے مواقع پیدا کرنے میں معاون ثابت ہو سکتا ہے۔

انہوں نے بتایا کہ نیشنل ٹیکنالوجی پارک کے منصوبے کی بنیاد 2017 اور 2018 کے دوران رکھی گئی تھی، تاہم بعد ازاں اسے تاخیر کا سامنا کرنا پڑا۔ وزیراعظم نے کہا کہ سیاسی پوائنٹ اسکورنگ کے بجائے اب بنیادی توجہ منصوبے کی تکمیل اور اسے جلد نوجوانوں کے لیے قابلِ استعمال بنانے پر ہونی چاہیے۔

شہباز شریف نے منصوبے پر کام کرنے والی ٹیم، وزارتِ خزانہ، وزارتِ انفارمیشن ٹیکنالوجی اور متعلقہ حکام کی کوششوں کو سراہا۔ انہوں نے بتایا کہ منصوبے کی پیش رفت کا جائزہ لینے کے لیے متعدد اجلاس منعقد کیے گئے تاکہ اسے جلد مکمل کرکے نوجوانوں کو اس سے فائدہ اٹھانے کا موقع فراہم کیا جا سکے۔

تقریب سے خطاب کرتے ہوئے وزیراعظم نے جنوبی کوریا کے ساتھ اپنے دیرینہ تعلقات کا ذکر بھی کیا۔ انہوں نے بتایا کہ وہ پہلی مرتبہ 1985 میں جنوبی کوریا گئے تھے، جبکہ 1997 اور 1998 میں بھی وہاں کے دورے کیے۔

وزیراعظم نے جنوبی کوریا کی معاشی ترقی اور محنتی افرادی قوت کو سراہتے ہوئے کہا کہ پاکستان بھی جدید ٹیکنالوجی کے فروغ اور نوجوانوں کی پیشہ ورانہ مہارتوں میں اضافے کے ذریعے ترقی کی نئی منزلیں حاصل کر سکتا ہے۔