یوکرین میں مسافر بسوں پر روسی گلائیڈ بم حملے، 33 افراد ہلاک، 18 زخمی ہونے کا دعویٰ
کیف(مانیٹرنگ ڈیسک) یوکرین کے شہر کراماتورسک میں 2 مسافر بسوں پر روسی گلائیڈ بم حملوں کے نتیجے میں 30 افراد ہلاک اور 18 زخمی ہونے کی اطلاعات سامنے آئی ہیں، جبکہ قریبی گاؤں بیلینکے میں بھی حملے کے دوران 3 افراد ہلاک ہوئے۔
یوکرینی حکام کے مطابق کراماتورسک میں مسافر بسوں کو نشانہ بنایا گیا، جس کے نتیجے میں بڑے پیمانے پر جانی نقصان ہوا۔ حکام نے روس پر الزام عائد کیا ہے کہ مسافر بسوں کو جان بوجھ کر حملے کا نشانہ بنایا گیا۔
یوکرینی صدر ولادیمیر زیلنسکی نے حملوں کی شدید مذمت کرتے ہوئے کہا ہے کہ اس کارروائی کو جواب دیے بغیر نہیں چھوڑا جائے گا۔ ان کے بیان کے بعد روس اور یوکرین کے درمیان جاری جنگ میں شہریوں کی سلامتی سے متعلق خدشات مزید بڑھ گئے ہیں۔
دوسری جانب واقعے پر روسی حکام کا مؤقف اور حملوں میں ہونے والے جانی نقصان کی آزادانہ تصدیق تاحال سامنے نہیں آسکی۔ واقعے کی مزید تفصیلات کا انتظار ہے۔
