ایپل نے اپنی میوزک اسٹریمنگ سروس پاکستان میں بھی شروع کر دی

اسلام آباد(جانوڈاٹ پی کے)ٹیکنالوجی کمپنی ایپل نے اپنی میوزک اسٹریمنگ سروس ایپل میوزک کی دستیابی مزید چار ممالک تک بڑھا دی ہے، جس کے بعد یہ سروس دنیا بھر کے 172 ممالک اور خطوں میں دستیاب ہوگئی ہے۔

9 ٹو 5 میک کے مطابق ایپل نے اپنی سپورٹ ویب سائٹ پر دستیابی کی فہرست اپ ڈیٹ کرتے ہوئے پاکستان، البانیہ، برونائی اور برکینا فاسو کو ایپل میوزک کے نئے ممالک میں شامل کیا ہے۔

دلچسپ بات یہ ہے کہ ان چار میں سے تین ممالک (پاکستان، البانیہ اور برکینا فاسو) ان خطوں میں بھی شامل ہیں جہاں ایپل نے حال ہی میں آئی کلاؤڈ پلس کے بعض پلانز میں ایپل ٹی وی اور ایپل آرکیڈ کی سہولت اضافی قیمت کے بغیر فراہم کرنے کا اعلان کیا تھا۔ برونائی اس فہرست میں شامل نہیں جہاں ایپل ٹی وی کی سبسکرپشن سروس تاحال دستیاب نہیں۔

ایپل میوزک کی عالمی توسیع کے ساتھ ہی اینڈرائیڈ صارفین کے لیے ایپ کا نیا بیٹا ورژن بھی جاری کیا گیا ہے۔

ایپل میوزک 7.0 میں ’لیکوئیڈ گلاس‘ ڈیزائن، نیا فلوٹنگ نیویگیشن بار اور منی پلیئر سمیت متعدد تبدیلیاں شامل کی گئی ہیں۔

پاکستان میں ایپل میوزک کی دستیابی سے صارفین اب ایپل کی میوزک اسٹریمنگ سروس کو باضابطہ طور پر استعمال کر سکیں گے جبکہ نئی ایپ اپ ڈیٹ اینڈرائیڈ صارفین کو بھی تازہ ترین ڈیزائن اور فیچرز فراہم کرے گی۔