انگلینڈ کے سابق آل راؤنڈر کین ٹیلر91برس کی عمر میں انتقال کرگئے

لندن (جانو ڈاٹ پی کے) انگلینڈ اور یارکشائر کے سابق آل راؤنڈر کین ٹیلر 91 برس کی عمر میں انتقال کرگئے۔ہڈرزفیلڈ میں پیدا ہونے والے کین ٹیلر نے صرف 17 برس کی عمر میں یارکشائر کی جانب سے فرسٹ کلاس کرکٹ کا آغاز کیا اور اپنے کیریئر میں 303 فرسٹ کلاس میچز کھیلے۔

کین ٹیلر نے 1959 سے 1968 کے دوران یارکشائر کی سات کاؤنٹی چیمپئن شپ ٹائٹلز میں اہم کردار ادا کیا۔ یارکشائر نے انہیں اپنی نسل کے انتہائی ہمہ گیر اور باصلاحیت کھلاڑیوں میں شمار کیا۔

بطور بلے باز انہوں نے فرسٹ کلاس کرکٹ میں 12 ہزار 864 رنز بنائے، جن میں 16 سنچریاں شامل تھیں۔ ان کی بہترین انفرادی اننگز 1961 میں وارکشائر کے خلاف ایجبسٹن میں ناقابل شکست 203 رنز تھی۔

کین ٹیلر صرف بیٹنگ تک محدود نہیں تھے بلکہ درمیانی رفتار کے مؤثر باؤلر بھی تھے۔ انہوں نے فرسٹ کلاس کیریئر میں 129 وکٹیں حاصل کیں اور 146 کیچز بھی پکڑے۔1961 کے روایتی روزز میچ میں لنکاشائر کے خلاف اولڈ ٹریفورڈ میں انہوں نے شاندار باؤلنگ کرتے ہوئے 75 رنز دے کر 6 وکٹیں حاصل کیں۔کین ٹیلر کے انتقال پر کرکٹ حلقوں کی جانب سے افسوس اور ان کی خدمات کو خراجِ تحسین پیش کیا جا رہا ہے۔