یمن میں حوثیوں کے خلاف بڑی کارروائی، 30 جنگجو ہلاک اور 60 زخمی ہونے کا دعویٰ

صنعا(جانو ڈاٹ پی کے)یمن میں سرکاری فوج اور حوثی تنظیم انصاراللہ کے درمیان جاری جھڑپوں میں یمنی سرکاری فوج نے بڑی کارروائی کا دعویٰ کردیا، 24 گھنٹوں کے دوران 30 حوثی جنگجوؤں کو ہلاک اور 60 کو زخمی کرنے کا دعویٰ سامنے آگیا۔

یمنی سرکاری فوج کے مطابق تعز کے مختلف علاقوں میں حوثی جنگجوؤں کے ساتھ شدید جھڑپیں ہوئیں، جن میں حوثی گروپ کو بھاری جانی نقصان پہنچا۔

فوج کی جانب سے جاری بیان میں دعویٰ کیا گیا کہ کارروائی کے دوران 30 حوثی جنگجو ہلاک جبکہ 60 زخمی ہوئے۔

یمنی سرکاری فوج کے مطابق لڑاکا طیاروں نے بھی کارروائیوں میں حصہ لیا اور حوثیوں کی گاڑیوں سمیت ان کے اجتماع کے مقامات کو نشانہ بنایا گیا۔

یمن میں سرکاری فوج اور حوثی اکثریتی تنظیم انصاراللہ کے درمیان طویل عرصے سے جاری تنازع کے باعث مختلف علاقوں میں وقتاً فوقتاً جھڑپیں ہوتی رہی ہیں، جبکہ تعز بھی ان علاقوں میں شامل ہے جہاں فریقین کے درمیان کشیدگی برقرار ہے۔

تاہم حوثی تنظیم کی جانب سے یمنی سرکاری فوج کے ہلاکتوں اور زخمیوں سے متعلق اس دعوے پر فوری طور پر کوئی تصدیق یا تفصیلی ردعمل سامنے نہیں آیا۔