سربیا میں سیاسی زلزلہ، صدر الیگزینڈر ووچیک کا مستعفی ہونے کا اعلان

بلغراد(جانو ڈاٹ پی کے) سربیا کے صدر الیگزینڈر ووچیک نے بڑا سیاسی فیصلہ کرتے ہوئے اعلان کیا ہے کہ وہ 27 ستمبر 2026 کو صدارت سے مستعفی ہوجائیں گے اور اس کے بعد وزیراعظم کے عہدے کے لیے انتخاب لڑیں گے۔

میڈیا رپورٹس کے مطابق صدر الیگزینڈر ووچیک نے یہ اعلان 15 ستمبر کو ایک ٹی وی پروگرام کے دوران کیا۔ ان کے اس فیصلے نے سربیا کی سیاست میں نئی بحث چھیڑ دی ہے۔

رپورٹس کے مطابق سربیا میں 25 اکتوبر 2026 کو قبل از وقت پارلیمانی انتخابات ہونے جارہے ہیں، جبکہ ووچیک کی جماعت سربین پروگریسو پارٹی (SNS) نے انہیں وزیراعظم کے امیدوار کے طور پر نامزد کردیا ہے۔

الیگزینڈر ووچیک آئینی طور پر مزید ایک صدارتی مدت کے لیے امیدوار نہیں بن سکتے، کیونکہ وہ پہلے ہی دو مرتبہ صدر منتخب ہوچکے ہیں۔ ایسے میں صدارت سے استعفیٰ دے کر وزارتِ عظمیٰ کے لیے میدان میں اترنے کا فیصلہ ان کے لیے اقتدار میں اپنا سیاسی کردار برقرار رکھنے کی اہم کوشش قرار دیا جارہا ہے۔

صدر ووچیک کے استعفے کے اعلان کے بعد سربیا میں آئندہ پارلیمانی انتخابات اور ان کے ممکنہ وزیراعظم بننے کے امکانات پر سیاسی حلقوں میں بحث تیز ہوگئی ہے۔