دنیا گھومنے کا جنون،چینی شخص نے 33 سال میں 233 ممالک کا سفر مکمل کرلیا

بیجنگ(جانوڈاٹ پی کے)لگ بھگ ہر فرد کو سیاحت کا شوق ہوتا ہے مگر بہت کم ایسے ہوتے ہیں جن کو ایسا کرنے کا موقع ملتا ہے۔

مگر چین سے تعلق رکھنے والے ایک شخص انٹرنیٹ پر وائرل ہوئے ہیں جو 33 سال تک پوری دنیا گھومتے رہے۔

اس عرصے میں انہوں نے 233 ممالک اور خطوں کی سیاحت کی۔

ایک رپورٹ کے مطابق 53 سالہ چن جینوئی کا تعلق صوبہ Zhejiang سے ہے اور وہ 33 سال بعد اپنا سفر مکمل کرکے آبائی قصبے Zhuji پہنچے۔

ایک مشینری کمپنی کے مالک چن جینوئی نے دنیا کی سیاحت کا آغاز 1993 میں سنگاپور، ملائیشیا اور تھائی لینڈ کے سفر سے کیا۔

اس وقت چونکہ انٹرنیٹ ہر ایک کو دستیاب نہیں تھا تو وہ خود دنیا کو دیکھنا چاہتے تھے۔

دہائیوں طویل سفر کے دوران انہوں نے اپنے کاروبار یا خاندان کو نظر انداز نہیں کیا، بلکہ ایسا معمول بنایا جس سے ذمہ داریاں پوری کرنے میں مدد ملے۔

رپورٹ کے مطابق وہ کئی بار چین واپس آکر ایک ماہ تک انتظار کرتے اور پھر دنیا کے سفر پر نکل جاتے۔

گزرے برسوں کے دوران انہوں نے قطبی خطوں سمیت متعدد مشکل مقامات کی سیر کی۔

نومبر 2015 میں پہلی بار انٹار کٹیکا جانے کی کوشش اس وقت ناکام ہوئی جب ان کا بحری جہاز راستے میں خراب ہوگیا۔

اس کے بعد جنوری 2016 میں وہ انٹار کٹیکا پہنچنے میں کامیاب ہوئے جبکہ نیوزی لینڈ کے ایک چھوٹے جزیرے Tokelau تک پہنچنے میں بھی انہیں مشکلات کا سامنا ہوا۔

وہاں پہنچنے کی پہلی کوشش ناکام ہونے کے ڈیڑھ سال بعد وہاں پہنچنے میں کامیاب ہوئے۔

افریقا کے سفر کے دوران انہیں ملیریا کا سامنا ہوا جبکہ یونان میں زلزلے کا تجربہ ہوا اور ان تمام تر مشکلات سے انہیں غیرمتوقع حالات کا مقابلہ کرنے میں مدد ملی۔

ان کا کہنا تھا کہ یہ سفر صرف سیاحتی مقامات کو دیکھنا نہیں تھا بلکہ وہ ہر جگہ زیادہ سے زیادہ وقت گزارنے اور مقامی ثقافت سے گھلنے ملنے کی کوشش کرتے تھے۔

اس سفر کے دوران انہوں نے 198 ممالک کی کرنسی کو اکٹھا کیا اور پھر ایک فلاحی ادارے کو عطیہ کر دیا۔

33 سال کے اس سفر کے دوران انہوں نے 15 لاکھ ڈالرز (41 کروڑ پاکستانی روپے سے زائد) خرچ کیے۔

اب وہ اپنا وقت بچوں اور والدین کے ساتھ گزارنے کا ارادہ رکھتے ہیں۔