لاہور،گلاب دیوی ہسپتال میں اچانک آگ بھڑک اٹھی،کارڈیالوجی بلاک میں خوف و ہراس، مریض بحفاظت نکال لیے گئے
لاہور (جانو ڈاٹ پی کے) گلاب دیوی ہسپتال میں تقریباً ایک گھنٹہ قبل اچانک آگ لگنے کے واقعے نے ہسپتال میں خوف و ہراس پھیلا دیا، تاہم بروقت کارروائی کے باعث کسی جانی نقصان کی اطلاع نہیں ملی۔
ذرائع کے مطابق آگ ڈپارٹمنٹ آف کارڈیالوجی کے ایکزیکٹو بلاک کے گراؤنڈ فلور پر لگی۔ واقعے کی اطلاع ملتے ہی فائر بریگیڈ کی ٹیمیں فوری طور پر موقع پر پہنچ گئیں اور بھرپور کارروائی کرتے ہوئے آگ پر قابو پالیا۔
آگ لگتے ہی ہسپتال میں موجود تمام مریضوں کو حفاظتی طور پر باہر نکال لیا گیا، جس کے باعث کسی بڑے نقصان سے بچا گیا۔ ابتدائی طور پر آگ لگنے کی وجہ شارٹ سرکٹ بتائی جا رہی ہے، تاہم حتمی وجہ کا تعین تحقیقات مکمل ہونے کے بعد ہی ہوسکے گا۔
فائر بریگیڈ کی جانب سے آگ بجھانے کے بعد متاثرہ حصے میں کولنگ کا عمل جاری ہے تاکہ دوبارہ آگ بھڑکنے کے خطرے کو مکمل طور پر ختم کیا جاسکے۔
واقعے کے بعد متعلقہ حکام کی جانب سے آگ لگنے کی وجوہات اور ممکنہ نقصانات کا جائزہ لیا جا رہا ہے۔ گلاب دیوی ہسپتال لاہور میں کارڈیالوجی سمیت متعدد طبی شعبے موجود ہیں۔
ابتدائی اطلاعات کے مطابق واقعے میں کوئی جانی نقصان نہیں ہوا۔
