جنوبی لبنان میں اسرائیلی انخلا کے بعد ملبے سے 4 لاشیں برآمد

بیروت(ویب ڈیسک) جنوبی لبنان کے قصبے زاوتر الغربیہ میں اسرائیلی فوج کے انخلا کے بعد امدادی کارروائیوں کے دوران ملبے تلے سے 4 افراد کی لاشیں برآمد کر لی گئی ہیں۔

لبنان کی سرکاری خبر رساں ایجنسی نیشنل نیوز ایجنسی کے مطابق سول ڈیفنس حکام نے بتایا کہ لاشوں کو ضروری قانونی کارروائی، شناخت اور پوسٹ مارٹم کے مراحل کے لیے قریبی ہسپتال منتقل کر دیا گیا ہے۔

سول ڈیفنس کے مطابق امدادی ٹیمیں علاقے میں مسلسل کام کر رہی ہیں تاکہ واپس آنے والے شہریوں کی حفاظت کو یقینی بنایا جا سکے۔ حکام کا کہنا ہے کہ قصبے میں متعدد عمارتیں شدید متاثر یا مکمل طور پر تباہ ہو چکی ہیں، جبکہ ملبے اور دیگر ممکنہ خطرات کے باعث حفاظتی اقدامات مزید سخت کیے جا رہے ہیں۔

امدادی حکام نے شہریوں سے اپیل کی ہے کہ وہ متاثرہ علاقوں میں احتیاط برتیں اور متعلقہ اداروں کی ہدایات پر عمل کریں تاکہ کسی بھی ممکنہ حادثے سے بچا جا سکے۔