فیصل آباد:شوہر نے قرض کی رقم کے بدلے بیوی کو دوست کے ہاتھوں فروخت کر دیا

فیصل آباد(جانوڈاٹ پی کے\ویب ڈیسک) فیصل آباد کے علاقے کوکیاں والا سے ایک خاتون نے سنگین الزامات عائد کرتے ہوئے دعویٰ کیا ہے کہ اس کے شوہر نے مبینہ طور پر قرض کی رقم کے عوض اسے اپنے دوست کے حوالے کر دیا، جہاں اسے زبردستی نکاح اور جنسی تشدد کا سامنا کرنا پڑا۔

متاثرہ خاتون نادیہ کے مطابق اس کی شادی تقریباً 12 سال قبل عثمان نامی شخص سے ہوئی تھی، جن کے تین بچے ہیں۔ اس کا کہنا ہے کہ شوہر نے اپنے دوست شہزاد سے 70 ہزار روپے قرض لیا تھا، جس کے بعد دونوں نے مبینہ طور پر اسے زبردستی شہزاد کے حوالے کر دیا۔

خاتون کا الزام ہے کہ بعد ازاں ایک جعلی طلاق نامہ تیار کیا گیا، اس سے زبردستی دستخط اور انگوٹھے لگوائے گئے، اور پھر دھمکیوں کے ذریعے اس کا جبری نکاح کرایا گیا۔ نادیہ کا مزید دعویٰ ہے کہ اسے تقریباً ایک سال تک جنسی تشدد کا نشانہ بنایا گیا۔

متاثرہ خاتون کے مطابق اس کے شوہر دو بچوں کو ساتھ لے کر چلا گیا، جبکہ ایک اور بچے کو مبینہ طور پر ملزم کے پاس رکھا گیا۔ اس کا کہنا ہے کہ اہل خانہ نے اسے جون میں بازیاب کرا لیا، تاہم اس کا چار سالہ بیٹا اب بھی ملزم کے پاس ہے اور اہل خانہ کو مبینہ طور پر دھمکیاں دی جا رہی ہیں۔

نادیہ نے بتایا کہ اس نے سی پی او فیصل آباد کو درخواست دے رکھی ہے، لیکن اس کے بقول اب تک ملزمان کی گرفتاری اور بچوں کی بازیابی میں پیش رفت نہیں ہو سکی۔

متاثرہ خاتون نے وزیراعلیٰ پنجاب مریم نواز اور آئی جی پنجاب سے اپیل کی ہے کہ اس کے بچوں کو بازیاب کرایا جائے اور ذمہ دار افراد کے خلاف قانون کے مطابق کارروائی کی جائے۔

نوٹ: اس خبر میں شامل تمام الزامات متاثرہ خاتون کے مؤقف پر مبنی ہیں۔ ان الزامات پر ملزمان یا پولیس کا تفصیلی مؤقف سامنے نہیں آیا، اور ان کی تصدیق عدالت یا تفتیشی اداروں کے ذریعے ہونا باقی ہے۔