ایمیز ایوارڈز میں سیلینا گومز کاسنہری انداز،نئی تصاویر وائرل ہوتے ہی سرجری کی افواہیں پھر گردش میں

لاس اینجلس(جانو ڈاٹ پی کے) امریکی گلوکارہ اور اداکارہ سیلینا گومز کی 15 ستمبر 2026 کو ایمیز ایوارڈز کی تقریب میں شرکت کے بعد ان کی نئی تصاویر سوشل میڈیا پر تیزی سے وائرل ہوگئیں، جس کے ساتھ ہی ان کی ظاہری شکل میں تبدیلی سے متعلق نئی قیاس آرائیاں بھی شروع ہوگئیں۔

سیلینا گومز نے تقریب میں سنہری لباس زیب تن کیا، تاہم ایونٹ کے بعد سامنے آنے والی تصاویر پر بعض سوشل میڈیا صارفین نے ان کے چہرے اور مجموعی ظاہری حلیے میں تبدیلی محسوس کرنے کا دعویٰ کیا۔

سوشل میڈیا پر بعض صارفین نے قیاس آرائی کی کہ شاید سیلینا گومز نے کاسمیٹک سرجری یا کوئی بیوٹی ٹریٹمنٹ کروایا ہے، جبکہ کچھ تبصروں میں انہیں ’ناقابلِ شناخت‘ تک قرار دیا گیا۔ تاہم ان دعوؤں کی آزادانہ طور پر تصدیق سامنے نہیں آئی۔

یہ پہلا موقع نہیں کہ سیلینا گومز کی ظاہری شکل کو سوشل میڈیا پر بحث کا موضوع بنایا گیا ہو۔ اس سے قبل بھی ان کے وزن اور چہرے میں تبدیلیوں کو مختلف بیوٹی ٹریٹمنٹس سے جوڑا جاتا رہا ہے۔

سیلینا گومز ماضی میں اپنی ظاہری شکل سے متعلق قیاس آرائیوں پر وضاحت بھی کر چکی ہیں۔ ایک موقع پر انہوں نے مزاحیہ انداز میں بوٹوکس کا ذکر کیا تھا، تاہم بعد میں اپنی جسمانی تبدیلیوں کی ایک وجہ لوپس اور اس سے منسلک جسم میں پانی جمع ہونے کی کیفیت کو قرار دیا تھا۔سیلینا گومز کی نئی تصاویر نے ایک بار پھر سوشل میڈیا پر ان کی ظاہری شکل، خوبصورتی کے معیار اور مشہور شخصیات کے بارے میں ہونے والی آن لائن قیاس آرائیوں کو بحث کا موضوع بنا دیا ہے۔