اسلام آباد میں ترنول پھاٹک کو ‘آبنائے ہرمز’ کہنے پر شہری گرفتار!
لاہور(خصوصی رپورٹ:جانو ڈاٹ پی کے)عالمی اور ملکی منظرنامے پر سنسنی خیز تبدیلیوں کا سلسلہ جاری ہے جہاں ایک طرف امریکہ اور ایران کے درمیان کشیدگی نے نیا رخ اختیار کر لیا ہے تو دوسری طرف پاکستان میں ایک شہری کو انوکھے جرم میں دھر لیا گیا ہے۔ سی این این کی حالیہ رپورٹ نے ایرانی دعوؤں کی تصدیق کرتے ہوئے انکشاف کیا ہے کہ امریکی صدر ڈونلڈ ٹرمپ کی جانب سے جنگ بندی میں توسیع محض ایک سیاسی چال ہے، جس کا مقصد امریکی افواج کو تازہ دم کرنا اور ایران کی چھوٹی تیز رفتار کشتیوں اور بارودی سرنگیں بچھانے والے جہازوں کو نشانہ بنانے کے لیے نئی جنگی حکمت عملی تیار کرنا ہے۔ ایران کا موقف سچ ثابت ہوا ہے کہ امریکہ مذاکرات کی آڑ میں حملے کی نئی منصوبہ بندی کر رہا ہے، جبکہ ٹرمپ نے ایٹمی ہتھیاروں کے استعمال کے امکان کو تو مسترد کر دیا ہے مگر "پوری تہذیب کو دفن کرنے” جیسی دھمکیوں سے خطے میں خوف و ہراس برقرار ہے۔
ملکی سطح پر اسلام آباد کے علاقے ترنول میں ایک دلچسپ مگر سنگین واقعہ پیش آیا جہاں پولیس نے ایک شہری کو صرف اس بنا پر گرفتار کر لیا کہ اس نے سوشل میڈیا پر ترنول پھاٹک پر ٹریفک کے شدید دباؤ کو طنزیہ طور پر "آبنائے ہرمز” سے تشبیہ دی تھی۔ پولیس نے دفعہ 188 اور دیگر دفعات کے تحت مقدمہ درج کرتے ہوئے اسے قانون کی گرفت میں لے لیا ہے۔ یہ واقعہ 55 سال قبل چوہدری ظہور الٰہی پر بھینس چوری کے مشہور مقدمے کی یاد تازہ کر رہا ہے، جس سے ظاہر ہوتا ہے کہ جدید دور کے باوجود پولیس کی سوچ اب بھی پرانے وقتوں میں قید ہے۔ اس کے علاوہ پاکستان نے یو اے ای کا 3 ارب 45 کروڑ ڈالر کا قرضہ مکمل طور پر ادا کر دیا ہے، جس کے بعد اب یو اے ای کا پاکستان پر کوئی واجب الادا قرضہ باقی نہیں رہا۔
