سینئر بھارتی فوجی افسر کی اہلیہ پر حساس معلومات غیرملکی ایجنسیوں کو دینے کا مقدمہ درج
نئی دہلی(مانیٹرنگ ڈیسک) سینئر بھارتی فوجی افسر کی اہلیہ کے خلاف قومی سلامتی سے متعلق حساس معلومات غیرملکی خفیہ ایجنسیوں کو فراہم کرنے کے الزام میں مقدمہ درج کر لیا گیا ہے۔
بھارتی نشریاتی ادارے این ڈی ٹی وی کے مطابق ملزمہ پر حساس دستاویزات، تصاویر اور الیکٹرانک ڈیٹا جمع کرنے اور غیرملکی عناصر کو منتقل کرنے میں ملوث ہونے کا الزام ہے۔
رپورٹ کے مطابق بھارتی فوج سے متعلق حساس معلومات غیرملکی خفیہ ایجنسیوں سے وابستہ افراد تک پہنچائی جا رہی تھیں۔ معاملے کے سامنے آنے کے بعد قومی سلامتی سے متعلق معلومات کے تحفظ اور حساس ڈیٹا تک رسائی کے نظام پر سوالات اٹھنے لگے ہیں۔
تاہم، ملزمہ کے خلاف عائد الزامات کی تفصیلات اور مقدمے میں ہونے والی مزید پیش رفت کے حوالے سے تاحال محدود معلومات سامنے آئی ہیں۔ الزامات ثابت ہونے یا عدالتی فیصلے سے قبل ملزمہ کو قصوروار قرار نہیں دیا جا سکتا۔
