کھیت میں چھپا رومی خزانہ برآمد،934چاندی کے سکے مل گئے

فرینکفرٹ(جانوڈاٹ  پی کے)مغربی جرمنی کے شہر ویزلنگ کے قریب ایک کھیت سے شوقیہ ماہرِ آثارِ قدیمہ نے دھاتی سراغ رساں آلے کی مدد سے رومی دور کے 934 چاندی کے سکے دریافت کرلیے، جنہیں شہنشاہ ہیڈرین کے دور سے متعلق جرمنی میں اب تک کا سب سے بڑا سکوں کا خزانہ قرار دیا جا رہا ہے۔

شوقیہ ماہرِ آثارِ قدیمہ اولیور رِیڈل نے تقریباً ایک سال قبل علاقے میں میٹل ڈیٹیکٹر کے ذریعے چند رومی سکے دریافت کیے تھے، تاہم آلے سے مسلسل سگنل ملنے پر انہیں اندازہ ہوا کہ زمین کے نیچے مزید بڑا خزانہ موجود ہوسکتا ہے۔

اولیور رِیڈل نے معاملے کی اطلاع متعلقہ حکام کو دی، جس کے بعد ماہرینِ آثارِ قدیمہ نے موقع پر کھدائی شروع کی۔ ماہرین کو مجموعی طور پر 934 رومی چاندی کے ڈیناری ملے، جن کا مجموعی وزن تقریباً 3.1 کلوگرام بتایا گیا ہے۔

مقامی محکمہ آثارِ قدیمہ کے مطابق یہ جرمنی میں رومی شہنشاہ ہیڈرین کے دور سے تعلق رکھنے والے سکوں کا اب تک دریافت ہونے والا سب سے بڑا خزانہ ہے۔

ماہرین کا خیال ہے کہ یہ خزانہ غالباً دوسری صدی عیسوی کے دوسرے چوتھائی میں جان بوجھ کر زمین میں دفن کیا گیا تھا۔ تاریخی سکوں کی یہ دریافت اس دور میں خطے میں رومی سلطنت کی موجودگی اور معاشی سرگرمیوں کے بارے میں مزید اہم معلومات فراہم کرسکتی ہے۔