خیبر پختونخوا میں پی ٹی آئی کا فاروڈ بلاک متحرک؟ سہیل آفریدی سمیت 8 رہنما حفاظتی تحویل میں

پولیس حکام کے مطابق حفاظتی تحویل میں لیے گئے رہنماؤں میں وزیراعلیٰ سہیل آفریدی، صوبائی اسمبلی کے اسپیکر بابر سلیم سواتی اور پی ٹی آئی کے صوبائی صدر جنید اکبر شامل ہیں۔ ایک سینئر پولیس افسر نے تصدیق کی کہ موجودہ صورتحال کے تناظر میں اہم سیاسی رہنماؤں کو حفاظتی تحویل میں لیا گیا ہے، تاہم باقی پانچ رہنماؤں کے نام ظاہر نہیں کیے گئے۔

وفاقی وزیر اطلاعات عطا اللہ تارڑ نے بھی واضح کیا تھا کہ سہیل آفریدی کو گرفتار نہیں کیا گیا بلکہ وہ حفاظتی تحویل میں ہیں۔ ان کے مطابق خیبر پختونخوا اسمبلی کی حیثیت معطل ہوچکی ہے اور صوبے کے انتظامی امور چلانے کے لیے نیا انتظامی بندوبست کیا جائے گا۔

ایمرجنسی اور گورنر راج کے بعد پی ٹی آئی کے اندرونی سیاسی معاملات اور فاروڈ بلاک کے کردار پر توجہ مرکوز ہوگئی ہے، تاہم دستیاب معلومات میں فاروڈ بلاک کی تشکیل، ارکان کی تعداد یا اس کے کسی باضابطہ فیصلے کی تصدیق نہیں ہوئی۔