پاک افغان سرحد پر سکیورٹی فورسز کی بڑی کارروائی، 26 خوارج ہلاک، متعدد ٹھکانے تباہ

رپورٹس کے مطابق یہ کارروائیاں حالیہ دہشت گرد حملوں کے تناظر میں کی گئیں، جن میں موسیٰ درہ میں وفاقی کانسٹیبلری چوکی پر حملہ، شمالی وزیرستان میں خودکش حملہ اور بنوں پولیس سٹیشن پر دہشت گرد کارروائی شامل ہیں۔

سکیورٹی ذرائع کے مطابق مستند انٹیلی جنس معلومات کی بنیاد پر فتنہ الخوارج کے خفیہ ٹھکانوں اور محفوظ پناہ گاہوں کو نشانہ بنایا گیا، جس کے نتیجے میں 26 دہشت گرد مارے گئے۔

کارروائیوں کے دوران چار اہم اہداف مکمل طور پر تباہ کر دیے گئے، جن میں ایک تربیتی مرکز، ایک خفیہ پناہ گاہ، اسلحہ و گولہ بارود کا بڑا ذخیرہ اور دہشت گرد کمانڈروں کے مراکز شامل تھے۔

ذرائع کے مطابق ہلاک ہونے والوں میں فتنہ الخوارج کے اہم کمانڈرز علیم خان خوشالی اور اختر محمد جانی خیل کے نیٹ ورک سے وابستہ عناصر بھی شامل تھے۔ کارروائی انتہائی درستگی اور پیشہ ورانہ مہارت سے انجام دی گئی اور صرف دہشت گردوں کے انفراسٹرکچر کو نشانہ بنایا گیا۔

حکام کا کہنا ہے کہ پاکستان خطے میں امن اور استحکام کے لیے پرعزم ہے، تاہم شہریوں کے جان و مال کا تحفظ اولین ترجیح ہے۔ نیشنل ایکشن پلان اور عزمِ استحکام وژن کے تحت دہشت گردی کے خلاف کارروائیاں پوری شدت سے جاری رہیں گی۔

سکیورٹی اداروں نے واضح کیا ہے کہ بیرونی سرپرستی میں ہونے والی دہشت گردی کے مکمل خاتمے تک انسدادِ دہشت گردی کی مہم بلا تعطل جاری رکھی جائے گی۔