اسلام آباد میں احتجاج کی تیاریاں، ادویات سے بھرے کنٹینرز بھی روک لیے گئے، محسن نقوی کا فوری ایکشن
اسلام آباد (جانو ڈاٹ پی کے)وفاقی دارالحکومت اسلام آباد میں متوقع احتجاج کے پیش نظر سکیورٹی انتظامات کے دوران کنٹینرز کی پکڑ دھکڑ کی اطلاعات سامنے آئی ہیں، جن میں ادویات سے لدے کنٹینرز بھی پولیس کی تحویل میں لیے جانے کا معاملہ شامل ہے۔
کنٹینر مالکان کے مطابق راولپنڈی اور اسلام آباد کے لیے ادویات لے کر آنے والے بعض کنٹینرز کو روک لیا گیا، جبکہ پولیس کی جانب سے کنٹینرز کی چابیاں اور ڈرائیونگ لائسنس، بلٹی رسید سمیت دیگر دستاویزات بھی تحویل میں لیے جانے کا دعویٰ کیا گیا۔ مالکان نے خدشہ ظاہر کیا کہ طویل عرصے تک کنٹینرز کھڑے رہنے سے گرمی کے باعث ادویات اور دیگر سامان متاثر ہوسکتا ہے۔
اس معاملے پر وفاقی وزیر داخلہ محسن نقوی نے فوری نوٹس لیا اور آئی جی اسلام آباد پولیس اور چیف کمشنر اسلام آباد سے رابطہ کیا۔ وزیر داخلہ نے تحویل میں لیے گئے ادویات کے تمام کنٹینرز فوری طور پر ریلیز کرنے کے احکامات جاری کرتے ہوئے واضح کیا کہ ادویات لانے اور لے جانے والے کنٹینرز اور گاڑیوں کو نہیں روکا جانا چاہیے۔
دوسری جانب اسلام آباد میں ممکنہ احتجاج کے پیش نظر انتظامیہ کی جانب سے سکیورٹی اور روٹ مینجمنٹ کے لیے کنٹینرز کی منتقلی کا سلسلہ بھی جاری ہے۔ ڈان کے مطابق جڑواں شہروں کی انتظامیہ نے احتجاج کے تناظر میں اضافی نفری، کنٹینرز اور دیگر حفاظتی اقدامات کی تیاری شروع کر رکھی ہے۔
وزیر داخلہ کی ہدایت کے بعد اب متعلقہ حکام کو ادویات کی ترسیل بلا تعطل یقینی بنانے کی ہدایت کی گئی ہے تاکہ شہریوں کے لیے ضروری ادویات کی فراہمی متاثر نہ ہو۔
