بشریٰ بی بی کی رہائی کا معاملہ طے پا گیا، امریکی صدر کی پاکستان آمد ؟ یس یا نو
لاہور: خصوصی رپورٹ (جانو ڈاٹ پی کے)پاکستان کے سیاسی میدان سے ایک بڑی خبر سامنے آئی ہے کہ تحریک انصاف اور مقتدر حلقوں کے درمیان مبینہ طور پر ایک ‘پولیٹیکل ڈیل’ طے پا گئی ہے، جس کی پہلی قسط کے طور پر بشریٰ بی بی کی رہائی کا قوی امکان پیدا ہو گیا ہے۔ ذرائع کے مطابق، بشریٰ بی بی کے وکیل سلمان صفدر نے 190 ملین پاؤنڈ کیس میں میڈیکل گراؤنڈز پر ضمانت کی نئی درخواست دائر کر دی ہے، جس میں عمران خان کو شامل نہیں کیا گیا۔ بشریٰ بی بی کی آنکھ کے آپریشن اور حالیہ علالت کو بنیاد بنا کر انہیں ریلیف دیے جانے کی تیاری مکمل کر لی گئی ہے۔ مبصرین کا کہنا ہے کہ وہ عمران خان جو کسی بھی صورت ‘این آر او’ نہ لینے کے دعوے کرتے تھے، اب اپنی اہلیہ کی رہائی کے لیے لچک دکھانے پر مجبور ہو گئے ہیں اور یہ پیشرفت اسی پسِ پردہ ڈیل کا نتیجہ معلوم ہوتی ہے۔
دوسری جانب، امریکی صدر ڈونلڈ ٹرمپ کے دورہ پاکستان کے حوالے سے جاری قیاس آرائیوں کا پردہ چاک کرتے ہوئے بتایا گیا ہے کہ صدر ٹرمپ کے پیر یا منگل کو اسلام آباد پہنچنے کی خبروں میں فی الحال کوئی صداقت نہیں ہے۔ سیکیورٹی پروٹوکول کے مطابق، کسی بھی امریکی صدر کی آمد سے کم از کم ایک ہفتہ قبل جدید سیکیورٹی ساز و سامان، بلٹ پروف گاڑیاں اور ایڈوانس سیکیورٹی ٹیمیں پہنچتی ہیں، جس کے آثار ابھی تک نظر نہیں آ رہے۔ تاہم، پاکستان کی معاشی صورتحال میں بہتری کی نوید سناتے ہوئے بتایا گیا ہے کہ پاکستان نے متحدہ عرب امارات (UAE) کو 2 ارب ڈالر کا قرضہ مع سود واپس کر دیا ہے، جبکہ سعودی عرب کی جانب سے مزید 8 ارب ڈالر کی امداد جلد ملنے کی توقع ہے۔
مقامی سیاست میں بھی بڑی ہلچل دیکھنے میں آئی ہے جہاں حمزہ شہباز شریف نے طویل خاموشی کے بعد دوبارہ سیاسی سرگرمیاں شروع کر دی ہیں۔ حمزہ شہباز نے خواجہ سعد رفیق اور سلمان رفیق کے گھر جا کر ان سے ملاقات کی ہے، جس سے ان افواہوں کو تقویت مل رہی ہے کہ رانا ثناء اللہ کی جگہ حمزہ شہباز کو مسلم لیگ ن کا نیا صوبائی صدر بنایا جا سکتا ہے۔ ملک میں بڑھتی ہوئی اس سیاسی اور معاشی سرگرمی کے حوالے سے مزید دلچسپ حقائق جاننے کے لیے گوہر بٹ کا یہ تازہ ترین وی لاگ ضرور دیکھیں۔
