امن مذاکرات خطرے میں، اسرائیل کی وحشیانہ بمباری ،لبنان نے بھی پاکستان کو پکار لیا
اسلام آباد: خصوصی رپورٹ (جانو ڈاٹ پی کے)مشرق وسطیٰ میں امن کی کوششوں کو شدید دھچکا پہنچا ہے اور پاکستان کی کامیاب سفارت کاری کے نتیجے میں ہونے والا سیز فائر اب اسرائیل کی ہٹ دھرمی کے باعث خطرے میں پڑ گیا ہے۔ گزشتہ چوبیس گھنٹوں کے دوران اسرائیلی فوج نے لبنان کے رہائشی علاقوں پر بدترین بمباری کرتے ہوئے محض دس منٹ میں سو سے زائد حملے کیے، جس کے نتیجے میں خواتین اور بچوں سمیت درجنوں شہری لقمہ اجل بن گئے۔ اسرائیل کا دعویٰ ہے کہ اس نے حزب اللہ کے نئے سربراہ نعیم قاسم کے بھانجے کو نشانہ بنایا ہے، تاہم لبنان نے اس وحشیانہ کارروائی پر پاکستانی وزیراعظم سے فوری مداخلت کی اپیل کی ہے۔ دوسری جانب ایرانی ہیکرز نے سابق اسرائیلی آرمی چیف ہرزہ حلوی کا موبائل ہیک کر کے عالمی سیاست میں کھلبلی مچا دی ہے۔ ہیکرز کی جانب سے جاری کردہ تصاویر اور ویڈیوز سے انکشاف ہوا ہے کہ غزا میں فلسطینیوں کی نسل کشی کے دوران اسرائیلی آرمی چیف نے اردن کا خفیہ دورہ کیا تھا جہاں انہیں والہانہ استقبال کے ساتھ ساتھ 1967 کی جنگ کی یادگاریں بھی پیش کی گئیں۔ ادھر تہران اور ریاض کے درمیان برف پگھلنے کی خبریں سامنے آئی ہیں جہاں ایرانی اور سعودی وزرائے خارجہ نے ٹیلی فونک رابطے میں کشیدگی کم کرنے اور تعلقات بہتر بنانے پر اتفاق کیا ہے۔ تاہم، ایران نے واضح کر دیا ہے کہ اگر اسرائیل نے لبنان پر حملے بند نہ کیے تو وہ اس سیز فائر کو ختم تصور کرے گا اور اسرائیل کو ایسا جواب دے گا جو اسے مدتوں یاد رہے گا۔ امریکہ کی جانب سے بھی سیز فائر کے نکات سے مکرنے کی اطلاعات ہیں، جس نے خطے میں ایک نئی اور زیادہ خوفناک جنگ کے بادل منڈلانے پر مجبور کر دیا ہے۔
توصیف احمد خان کی اس رپورٹ کا مکمل وی لاگ اور ہیک شدہ موبائل کے انکشافات دیکھنے کے لیے اس لنک پر کلک کریں:
