معروف گلوکار اور اداکار کی اہلیہ سے علیحدگی ، خود طلاق کی تصدیق کردی

ڈھاکہ (مانیٹرنگ ڈیسک)بنگلادیش کے معروف گلوکار اور اداکار تحسن خان اور ان کی اہلیہ، میک اپ آرٹسٹ روزا احمد کے درمیان علیحدگی ہو گئی ہے۔ بنگلادیشی میڈیا کے مطابق دونوں کی شادی گزشتہ چند ماہ سے مشکلات کا شکار تھی اور وہ کافی عرصے سے علیحدہ رہ رہے تھے۔

میڈیا رپورٹس کے مطابق تحسن خان اور روزا احمد کے درمیان تعلقات ختم ہونے کے قریب تھے، تاہم دونوں نے طویل عرصے تک اس معاملے پر خاموشی اختیار کیے رکھی۔ اب تحسن خان نے خود اس علیحدگی کی تصدیق کر دی ہے۔

تحسن خان کا کہنا ہے کہ وہ اور روزا احمد جولائی کے اختتام سے الگ رہ رہے ہیں۔ انہوں نے وضاحت کرتے ہوئے کہا کہ وہ اپنی ذاتی زندگی کو نجی رکھنا چاہتے تھے، تاہم شادی کی سالگرہ سے متعلق سوشل میڈیا پر گردش کرنے والی غلط خبروں کے باعث وضاحت دینا ضروری ہو گیا۔

یاد رہے کہ تحسن خان نے 4 جنوری 2025 کو بغیر کسی پیشگی اعلان کے میک اپ آرٹسٹ روزا احمد سے شادی کی تھی۔ اس وقت میڈیا میں بتایا گیا تھا کہ دونوں ایک دوسرے کو محض چار ماہ سے جانتے تھے۔ روزا احمد ایک تجربہ کار میک اپ آرٹسٹ ہیں اور امریکا کے شہر نیویارک میں اپنا میک اپ اسٹوڈیو بھی چلاتی ہیں۔

تاحال دونوں کے درمیان علیحدگی کی وجوہات سامنے نہیں آ سکیں۔ اس حوالے سے تحسن خان کا کہنا ہے کہ وہ مناسب وقت پر مزید تفصیلات شیئر کریں گے۔