اقوام متحدہ کا امریکا کی وینزویلا میں فوجی کارروائی پر اظہارِ تشویش، عالمی قوانین کے احترام پر زور

نیویارک (جانوڈاٹ پی کے)اقوام متحدہ کے سیکرٹری جنرل نے وینزویلا میں حالیہ کشیدگی میں اضافے، بالخصوص امریکا کی جانب سے کی گئی فوجی کارروائی پر گہری تشویش کا اظہار کرتے ہوئے خبردار کیا ہے کہ اس پیش رفت کے خطے اور عالمی امن پر سنگین اثرات مرتب ہو سکتے ہیں۔

نیویارک میں جاری اپنے بیان میں سیکرٹری جنرل کا کہنا تھا کہ وینزویلا کی اندرونی صورتحال سے قطع نظر، اس نوعیت کی فوجی کارروائیاں ایک خطرناک نظیر قائم کرتی ہیں، جو بین الاقوامی امن و سلامتی کے لیے نقصان دہ ثابت ہو سکتی ہیں۔

انہوں نے اس بات پر زور دیا کہ تمام فریقین بین الاقوامی قانون، بالخصوص اقوام متحدہ کے چارٹر کے اصولوں کا مکمل احترام کریں۔ سیکرٹری جنرل نے اس امر پر تشویش کا اظہار کیا کہ حالیہ پیش رفت میں بین الاقوامی قوانین اور خودمختاری کے بنیادی اصولوں کی پاسداری نظر نہیں آتی، جو عالمی قانونی نظام کو کمزور کرنے کے مترادف ہے۔

اقوام متحدہ کے سربراہ نے وینزویلا کے تمام فریقین سے مطالبہ کیا کہ وہ انسانی حقوق، قانون کی حکمرانی اور بین الاقوامی اصولوں کے احترام کے ساتھ جامع، بامقصد اور نتیجہ خیز مذاکرات کا راستہ اختیار کریں، تاکہ بحران کا پرامن اور پائیدار حل ممکن بنایا جا سکے۔

یہ بیان ایسے وقت میں سامنے آیا ہے جب وینزویلا میں سیاسی اور عسکری صورتحال تیزی سے کشیدہ ہو رہی ہے، جبکہ عالمی برادری اس بحران کے ممکنہ علاقائی اور عالمی اثرات پر گہری نظر رکھے ہوئے ہے۔