طالبان نے ننگرہار میں درجنوں موسیقی کے آلات نذرِ آتش کر دئیے، 25 افراد گرفتار

کابل(جانوڈاٹ پی کے)افغانستان کے مشرقی صوبے ننگرہار میں طالبان نے درجنوں آلات موسیقی  جمع کرکے نذرِ آتش کر دیے۔

ننگرہار کے گورنر آفس کی جانب سے جاری بیان میں کہا گیا ہے کہ امر بالمعروف و نہی عن المنکر کی وزارت سے وابستہ اہلکاروں نے جلال آباد شہر  میں کارروائی کے دوران 86 موسیقی کے آلات ضبط کیے جنہیں ایک مشترکہ کمیٹی کی موجودگی میں جلایا گیا۔

بیان کے مطابق یہ اقدام ان سرگرمیوں کی روک تھام کے لیے اٹھایا گیا جنہیں طالبان نے غیر اخلاقی قرار دیا ہے اور ایسی کارروائیاں آئندہ بھی جاری رہیں گی۔

دوسری جانب افغان طالبان نے  ملک کے شمال مشرقی صوبے تخار میں ایک نجی تقریب میں موسیقی بجانے کے الزام میں کم از کم 25 افراد کو حراست میں لے لیا ہے۔

خیال رہے کہ اگست 2021 میں اقتدار میں واپسی کے بعد طالبان نے افغانستان میں موسیقی پر سخت پابندیاں عائد کر رکھی ہیں جن کے تحت عوامی تقریبات، شادیوں، ریڈیو اور ٹیلی ویژن نشریات اور متعدد عوامی مقامات پر موسیقی پر پابندی ہے۔