ٹرمپ کی وزیر اعظم شہباز شریف اور فیلڈ مارشل عاصم منیر کیساتھ مضبوط ذاتی کیمسٹری!

نیویارک(جانوڈاٹ پی کے)امریکی جریدے فارن پالیسی نے پاک امریکا تعلقات پر رپورٹ جاری کر دی ہے جس میں کہا گیاہے کہ صدر ٹرمپ کے دوسرے دور میں پاکستان نے سب سے مؤثر اور کامیاب سفارتی تعلقات بنائے،صدر ٹرمپ کی وزیر اعظم شہباز شریف اور فیلڈ مارشل عاصم منیر کے ساتھ مضبوط ذاتی کیمسٹری بنی، امریکی صدر نے فیلڈ مارشل عاصم منیر اور وزیراعظم شہبازشریف کو کئی بار وائٹ ہاؤس مدعو کیا۔

امریکی جریدے کے مطابق کابل دھماکے کے ماسٹر مائنڈ کی گرفتاری میں مدد سمیت پاکستان نے بروقت تعاون کے ذریعے امریکی صدر کا اعتماد حاصل کیا،پاکستان نے ٹرمپ کے قریبی لابیسٹ، کرپٹو اور معدنیات جیسے شعبوں پر سرمایہ کاری کر کے تعلقات کو فائدہ پہنچایا، ٹرمپ کے دوسرے دور میں پاکستان نے سب سے مؤثر اور کامیاب سفارتی تعلقات بنائے ہیں۔

اہم کامیابی کرٹیکل منرلز کے شعبے میں آئی،جس میں ایف ڈبلیو او اور امریکی کمپنی کے درمیان500ملین ڈالر کا معاہدہ شامل ہے،کرپٹو تعاون میں اضافہ ہوا،پاکستان کرپٹو کونسل نے ورلڈ لبرٹی فنانشل کیساتھ شراکت بڑھائی،ٹرمپ کا بھارت کیساتھ رویہ سخت ہے،جس کی وجہ ٹیرف،روسی تیل اور حالیہ پاک بھارت کشیدگی ہے۔

مئی کی جنگ بندی کا کریڈٹ پاکستان نے کھل کر ٹرمپ کو دیا جبکہ بھارت نے اسے مسترد کیا، گرمجوشی کیوجہ سے امریکی بیانیہ پاکستان کیلئے نرم ہوا ہے،پاکستان کی خواہش ہے امریکا کیساتھ تعلقات کسی تیسرے ملک کے تناظر میں نہ دیکھے جائیں۔