خیبرپختونخوا میں خطرناک وائرس پھیلنےکا خطرہ، ہنگامی ایڈوائزری جاری

پشاور(جانوڈاٹ پی کے)محکمہ صحت خیبر پختونخوا نے خطرے کی گھنٹی بجا دی۔صوبے میں آئندہ سال انفلوئنزا وائرس  پھیلنے کے خطرہ سے متعلق ایڈوائزری جاری کردی ہے۔

تفصیلات کے مطابق محکمہ صحت خیبر پختونخوا کے مطابق صوبے میں اپریل تک انفلوئنزا وائرس پھیلنےکا خطرہ ہے جس کے پیشِ نظر ہنگامی ایڈوائزری جاری کردی گئی ہے۔

محکمہ صحت کا بتانا ہےکہ ایڈوائزری نیشنل انسٹی ٹیوٹ آف ہیلتھ اسلام آباد کی سفارشات پرتیارکی گئی جس میں  فلو سے بچاؤ، کنٹرول اور علاج سے متعلق جامع ہدایات  ہیں جب کہ فلو سے بچاؤ کی ویکسین مؤثر حفاظتی اقدام قرار دیا گیا ہے۔

محکمہ صحت کا کہنا ہےکہ فلو کےکیسز میں نومبر سے اپریل تک اضافےکا امکان ہے،  بزرگ، 5 سال سےکم عمر بچے اور حاملہ خواتین محتاط رہیں جب کہ دائمی امراض کےمریض خصوصی طور پر احتیاطی تدابیر اختیارکریں۔

محکمہ صحت کے مطابق ہاتھوں کی صفائی اور ماسک کے استعمال سے وائرس کے پھیلاؤ میں کمی ممکن ہے۔