سلمان خان نے نانا پاٹیکر کے انتقال پرعوامی تقریب میں شرکت مؤخر کردی

ممبئی(جانوڈاٹ پی کے)سینئر بالی ووڈ اداکار نانا پاٹیکر کی اچانک موت کے بعد سلمان خان نے اپنی ایک طے شدہ عوامی تقریب ملتوی کر دی۔ نئی تاریخ کا اعلان بعد میں کیا جائے گا۔

تقریب ملتوی کرنے کی بنیادی وجہ یہ بتائی جا رہی ہے کہ بالی ووڈ انڈسٹری کی ساتھی شخصیات نانا پاٹیکر کا انتہائی احترام کرتی ہیں اور ان سے گہری محبت رکھتی ہیں، کہا جاتا ہے کہ سلمان خان کے بھی ان کے ساتھ کافی اچھے تعلقات تھے۔

ذرائع کا کہنا ہے کہ سلمان خان نے محسوس کیا کہ یہ کسی عوامی تقریب میں شرکت کا مناسب وقت نہیں ہے، اس لیے انہوں نے اسے فی الحال ملتوی کرنے کا فیصلہ کیا۔ ابھی تک نئی تاریخ کا اعلان نہیں کیا گیا ہے اور نہ ہی سلمان خان یا منتظمین کی جانب سے اس معاملے پر کوئی رسمی بیان جاری ہوا ہے۔

دونوں اداکاروں نے سنجے لیلا بھنسالی کی فلم ’خاموشی: دی میوزیکل‘ میں ایک ساتھ کام کیا تھا۔ اس فلم میں سلمان خان اور منیشا کوئرالہ مرکزی کرداروں میں تھے۔

یہ فلم آج بھی ان تمام اداکاروں کے کیریئر کی یادگار ترین فلموں میں شمار ہوتی ہے اور نانا پاٹیکر کی اداکاری اس فلم کے سب سے نمایاں پہلوؤں میں سے ایک تھی۔

دیگر کئی شوبز شخصیات نے بھی نانا پاٹیکر کی اچانک موت پر گہرے دکھ کا اظہار کیا اور سوشل میڈیا پر تعزیتی پیغامات شیئر کرتے ہوئے اس عظیم اداکار کو یاد کیا ہے۔

پدم شری ایوارڈ یافتہ نانا پاٹیکر آج صبح سویرے گوا میں واقع اپنی رہائش گاہ دونا پاؤلا میں دل کا دورہ پڑنے سے 75 سال کی عمر میں چل بسے تھے۔

حکومتِ مہاراشٹر نے اعلان کیا ہے کہ نانا پاٹیکر کی بھارتی شوبز کیلئے خدمات اور ’نام فاؤنڈیشن‘ کے ذریعے ان کے سماجی و فلاحی کاموں کے اعتراف میں ان کی آخری رسومات سرکاری اعزاز کے ساتھ ادا کی جائیں گی۔