اداکاری کو سنجیدہ نہ لینا جان سینا کو بھاری پڑ گیا، فلمی کیریئر تقریباً ختم ہونے کا انکشاف

ہالی ووڈ (جانو ڈاٹ پی کے)ہالی ووڈ اداکار اور سابق ڈبلیو ڈبلیو ای اسٹار جان سینا نے اپنے ابتدائی فلمی کیریئر کے حوالے سے بڑا اعتراف کرتے ہوئے کہا ہے کہ ایک وقت میں اداکاری کو مطلوبہ سنجیدگی نہ دینے کے باعث ان کا فلمی سفر تقریباً اختتام کے قریب پہنچ گیا تھا۔

جان سینا گزشتہ تقریباً دو دہائیوں سے فلمی دنیا میں سرگرم ہیں۔ ریسلنگ رنگ میں عالمی شہرت حاصل کرنے کے بعد انہوں نے 2006 میں فلم ’دی میرین‘ کے ذریعے بڑے پردے پر قدم رکھا، تاہم ابتدائی برسوں میں ان کی ترجیحات فلموں کے بجائے ریسلنگ ہی رہی۔

اپنی نئی فلم ’میچ باکس: دی مووی‘ کے حوالے سے گفتگو کرتے ہوئے جان سینا نے ماضی کو یاد کیا اور بتایا کہ انہیں دنیا بھر میں ریسلنگ کے لیے سفر کرنا اور ہزاروں شائقین کے سامنے پرفارم کرنا زیادہ پسند تھا، جس کے باعث فلمی منصوبوں پر ان کی توجہ مکمل طور پر مرکوز نہیں تھی۔

اداکار کے مطابق فلم کے سیٹ پر کام کرنے کا انداز ریسلنگ سے بالکل مختلف تھا۔ شوٹنگ کے دوران انہیں کام کی رفتار انتہائی سست محسوس ہوتی اور وہ اکثر سوچتے تھے کہ ایک کام مکمل کرنے میں اتنا وقت کیوں لگ رہا ہے۔

جان سینا نے اعتراف کیا کہ اس دوران ان کا دل بھی اپنے ابتدائی فلمی منصوبوں میں پوری طرح نہیں لگتا تھا اور انہیں بالآخر احساس ہوا کہ اپنے رویے میں تبدیلی لانا ضروری ہے۔

ان کے مطابق فلمی دنیا سے دور کیے جانے کی ایک وجہ یہ بھی تھی کہ انہوں نے اداکاری کو اس وقت وہ سنجیدگی نہیں دی جس کی ضرورت تھی، اور وہ سمجھتے ہیں کہ اس کا نتیجہ سامنے آنا بالکل جائز تھا۔

جان سینا کا کہنا تھا کہ اب ان کا انداز بالکل تبدیل ہوچکا ہے۔ وہ فلم بنانے کے پورے عمل سے لطف اندوز ہوتے ہیں اور پروڈکشن سے وابستہ ہر فرد کی محنت، ذمہ داری اور کردار کو پہلے سے کہیں زیادہ سمجھتے اور سراہتے ہیں۔

اداکار کے مطابق اب وہ اپنے کام کو لے کر پہلے سے زیادہ پُرجوش ہیں اور فلم سازی کے مختلف مراحل میں شامل لوگوں کی محنت کی قدر کرتے ہیں۔