پاکستان ایران پر تمام قابل اطلاق امریکی پابندیوں کی پاسداری کرتا ہے،ترجمان دفتر خارجہ
اسلام آباد(جانوڈاٹ پی کے)ترجمان دفتر خارجہ کا کہنا ہےکہ پاکستان ایران پر تمام قابل اطلاق امریکی پابندیوں کی پاسداری کرتا ہے۔
دفتر خارجہ کے ترجمان سجاد حیدر خان نے ہفتہ وار پریس بریفنگ میں کہا کہ پاکستان بین الاقوامی اور ملکی قوانین کے مطابق پابندیوں کے تمام نظام پر عملدرآمد جاری رکھےگا۔
ایران امریکا جنگ سے متعلق سوال پر ترجمان دفتر خارجہ نے کہا کہ پاکستان تمام متعلقہ فریقوں کے ساتھ مستقل اور تعمیری رابطے میں ہے۔
انہوں نے کہا کہ پاکستان، ایران اورامریکا کے درمیان رابطوں میں سہولت کاری کا کردار ادا کررہا ہے، ایران امریکا تنازع کا حل مذاکرات اور سفارت کاری سے نکالنے کی ضرورت ہے۔
سجاد حیدر خان نے کہا کہ پاکستان، ایران اور امریکا کو اسلام آباد مفاہمتی معاہدے کے تحت ذمہ داریاں پوری کرنے پر زوردیتا ہے، مذاکرات اور سفارتکاری ہی تنازع کے پرامن حل کا قابل عمل راستہ ہے۔
ترجمان نے کہا شنگھائی تعاون تنظیم (ایس سی او) کے تمام رکن ممالک کے نیشنل کوآرڈینیٹرز میں بھارت کا نمائندہ بھی اسلام آباد آیا، دو سال سے زائد عرصے بعد بھارت سے ایک سینیئرعہدیدارکا پاکستان کا دورہ اہم پیشرفت ہے۔
ایک سوال کے جواب میں دفتر خارجہ کے ترجمان نے کہا کہ پاکستانی سفارتی ٹیم صومالیہ میں زخمی پاکستانیوں اورجاں بحق افراد کی میتوں کی واپسی کے لیے سرگرم ہے۔
انہوں نے کہا کہ صومالیہ میں پاکستانی سفارتخانے کےناظم الامور زخمی پاکستانیوں سے رابطے میں ہیں، جاں بحق پاکستانیوں کی میتیں ایتھوپین ائیرلائن کے ذریعے پاکستان منتقل کی جائیں گی۔
