”کوئی کھلاڑی اہم نہیں،ٹیم کو جس کی ضرورت ہوگی وہی کھیلے گا”بابر اعظم کا بڑا اعلان

لندن (جانو ڈاٹ پی کے) لارڈز ٹیسٹ سے قبل قومی ٹیسٹ ٹیم کے کپتان بابر اعظم نے واضح کردیا ہے کہ ٹیم میں کسی ایک کھلاڑی کو غیر معمولی اہمیت حاصل نہیں، جس کھلاڑی کی ٹیم کو ضرورت ہوگی، اسے میدان میں اتارا جائے گا۔ بابر اعظم کے اس دوٹوک بیان نے قومی ٹیم کی ممکنہ فائنل الیون کے حوالے سے تجسس مزید بڑھا دیا ہے۔

لارڈز میں پریس کانفرنس کرتے ہوئے بابر اعظم نے کہا کہ فائنل الیون کا فیصلہ پچ کا جائزہ لینے کے بعد کیا جائے گا۔ ان کے مطابق جو بہترین دستیاب کھلاڑی ہوں گے، انہیں استعمال کیا جائے گا، جبکہ جیت کیلئے ذمہ داری پوری ٹیم کی ہے۔

پہلے ٹیسٹ کی خامیاں سامنے آگئیں

بابر اعظم نے پہلے ٹیسٹ میں پاکستان کی کارکردگی کا جائزہ لیتے ہوئے تسلیم کیا کہ ٹیم نے اچھا کھیل پیش نہیں کیا۔ ان کا کہنا تھا کہ شکست کے بعد کھلاڑیوں نے بیٹھ کر خامیوں پر بات کی ہے اور اب کوشش ہوگی کہ اگلے میچ میں وہ غلطیاں دوبارہ نہ دہرائی جائیں۔

کپتان نے خاص طور پر ایک اہم کمزوری کی نشاندہی کرتے ہوئے کہا کہ پارٹنرشپ بننے کے بعد پاکستانی بیٹرز کی بیک ٹو بیک وکٹیں گر جاتی ہیں۔ ان کے مطابق ٹیم اس مسئلے پر مزید توجہ دے رہی ہے اور کوشش ہوگی کہ لارڈز ٹیسٹ میں اس خامی کو دور کیا جائے۔

رضوان نہیں، پوری ٹیم کو پرفارم کرنا ہوگا

بابر اعظم نے سینئر کھلاڑیوں پر دباؤ کے تاثر کو مسترد کرتے ہوئے کہا کہ سینئرز پر بوجھ نہیں بلکہ ذمہ داری ہے اور انہیں آگے بڑھ کر پرفارم کرنا ہوگا۔

انہوں نے کہا کہ صرف محمد رضوان ہی نہیں بلکہ پوری ٹیم کی ذمہ داری ہے کہ وہ اپنی کارکردگی دکھائے۔ بابر اعظم کے مطابق اگر بولرز 20 وکٹیں حاصل کرتے ہیں تو بیٹرز کو بھی رنز بنانے ہوں گے۔

عبداللہ شفیق کی پوزیشن بھی واضح کردی

قومی کپتان نے عبداللہ شفیق سے متعلق بھی اپنا مؤقف واضح کرتے ہوئے کہا کہ وہ جس نمبر پر کھیل رہے ہیں، اسی پوزیشن پر انہیں کھیلنا چاہیے۔

بابر اعظم نے کہا کہ جو کھلاڑی اس وقت پرفارم نہیں کررہے، انہیں اعتماد دینے کی کوشش کی جائے گی تاکہ وہ اپنی صلاحیتوں کے مطابق کارکردگی دکھا سکیں۔

لارڈز میں جیت کا تسلسل برقرار رکھنے کا عزم

بابر اعظم نے کہا کہ لارڈز میں جیت کا جو تسلسل ہے، پاکستان کوشش کرے گا کہ اسے برقرار رکھا جائے۔ ان کا کہنا تھا کہ ٹیم نے پہلے ٹیسٹ کی غلطیوں سے سیکھا ہے اور اب اگلے میچ میں بہتر کارکردگی دکھانے کیلئے پرعزم ہے۔

انہوں نے پُراعتماد انداز میں کہا کہ اس بار پاکستانی ٹیم کی پرفارمنس گزشتہ میچ سے مختلف نظر آئے گی۔

بابر اعظم کی فٹنس پر بھی بڑا اپ ڈیٹ

قومی ٹیم کے کپتان نے اپنی فٹنس کے حوالے سے بھی اہم اپ ڈیٹ دیتے ہوئے کہا کہ وہ اگلے میچ اور بقیہ سیریز کیلئے 90 فیصد فٹ ہیں۔

لارڈز میں ہونے والے دوسرے ٹیسٹ سے قبل بابر اعظم کے بیانات سے واضح ہے کہ پاکستان ٹیم پہلے ٹیسٹ کی خامیوں پر قابو پانے، بیٹنگ میں لمبی پارٹنرشپس بنانے اور وکٹوں کے اچانک گرنے کا سلسلہ روکنے کیلئے نئی حکمت عملی کے ساتھ میدان میں اترنے کی تیاری کررہی ہے۔