آزادکشمیرفسادی جتھے کی فائرنگ،رینجرز اہلکارسینے پرگولی لگنے سے شہید

مظفرآباد (جانو ڈاٹ پی کے) آزاد کشمیر میں بند سڑکیں کھولنے کیلئے جاری کلیئرنس آپریشن کے دوران فائرنگ کے افسوسناک واقعے میں رینجرز کا ایک اہلکار شہید جبکہ ایک اہلکار شدید زخمی ہوگیا۔

ذرائع کے مطابق سرساوہ تا تراڑ کھل سڑک کی کلیئرنس کے دوران مسلح افراد کی جانب سے اچانک فائرنگ کی گئی۔ فائرنگ کے نتیجے میں رینجرز اہلکار شاہ نواز کے سینے میں گولی لگی اور وہ شہید ہوگئے، جبکہ لانس نائیک بلال کندھے پر گولی لگنے سے شدید زخمی ہوئے۔

واقعے کے بعد علاقے میں سکیورٹی مزید سخت کردی گئی اور کلیئرنس آپریشن سے متعلق اقدامات جاری رکھے گئے۔ زخمی لانس نائیک بلال کو طبی امداد کیلئے منتقل کیا گیا ہے۔

خیرپور کا سپوت فرض کی ادائیگی میں شہید

فائرنگ کے واقعے میں شہید ہونے والے رینجرز اہلکار شاہ نواز کا تعلق خیرپور، سندھ سے بتایا گیا ہے۔ اہلکار نے عوامی آمدورفت بحال کرنے اور مشکل حالات میں سڑکیں کھولنے کے آپریشن کے دوران اپنی جان کا نذرانہ پیش کیا۔

بند راستوں کی بحالی کیلئے آپریشن جاری

ذرائع کے مطابق علاقے میں سڑکیں بند ہونے کے باعث آمدورفت شدید متاثر ہے، جبکہ بعض مقامات پر غذائی قلت کے خدشات بھی موجود ہیں۔ انہی مشکلات کے پیش نظر بند راستوں کو کھولنے اور عوام کیلئے آمدورفت بحال کرنے کی خاطر کلیئرنس آپریشن کیا جارہا ہے۔

تاہم آپریشن کے دوران فائرنگ کے واقعے نے صورتحال کو مزید کشیدہ کردیا ہے۔ قانون نافذ کرنے والے ادارے علاقے میں سکیورٹی صورتحال کا جائزہ لے رہے ہیں اور حملے میں ملوث افراد کے خلاف کارروائی کیلئے اقدامات جاری ہیں۔

شہید رینجرز اہلکار کی قربانی پر اہل علاقہ اور مختلف حلقوں کی جانب سے افسوس اور خراج عقیدت کا اظہار کیا جارہا ہے، جبکہ زخمی اہلکار کی جلد صحت یابی کیلئے دعا کی جارہی ہے۔