یومِ شہدائے پولیس آج منایا جا رہا ہے، وطن پر جان نچھاور کرنے والے بہادر سپوتوں کو قوم کا سلام
لاہور(جانوڈاٹ پی کے) ملک بھر میں آج یومِ شہدائے پولیس انتہائی عقیدت، احترام اور قومی جذبے کے ساتھ منایا جا رہا ہے تاکہ وطن کے امن، قانون کی بالادستی اور عوام کے تحفظ کے لیے اپنی جانوں کا نذرانہ پیش کرنے والے بہادر پولیس افسران اور اہلکاروں کو خراجِ عقیدت پیش کیا جا سکے۔
"شہید کی جو موت ہے، وہ قوم کی حیات ہے” کے جذبے کے تحت ملک بھر میں خصوصی تقریبات، قرآن خوانی، فاتحہ خوانی اور شہدائے پولیس کی یادگاروں پر پھولوں کی چادریں چڑھائی جا رہی ہیں۔
پولیس حکام کا کہنا ہے کہ دہشت گردی، جرائم اور امن دشمن عناصر کے خلاف جنگ میں پولیس نے ہمیشہ ہراول دستے کا کردار ادا کیا اور بے شمار افسران و اہلکاروں نے اپنی جانوں کا نذرانہ دے کر امن کی شمع روشن رکھی۔
یومِ شہدائے پولیس کے موقع پر شہداء کے اہلِ خانہ کو بھی خراجِ تحسین پیش کیا جا رہا ہے، جنہوں نے عظیم قربانیوں کو صبر، حوصلے اور استقامت کے ساتھ برداشت کیا۔ حکام نے اس عزم کا اعادہ کیا کہ شہدائے پولیس کی قربانیوں کو کبھی فراموش نہیں کیا جائے گا اور ان کے مشن کو اسی جذبے کے ساتھ آگے بڑھایا جاتا رہے گا۔
چار اگست کا دن اس عہد کی تجدید بھی ہے کہ وطن کی سلامتی، قانون کی حکمرانی اور عوام کے تحفظ کے لیے شہدائے پولیس کی لازوال قربانیاں ہمیشہ قوم کے لیے مشعلِ راہ رہیں گی۔
