امریکا، ایران تکنیکی مذاکرات جاری، سفارتی عمل آگے بڑھ رہا ہے، امریکی نائب صدر جے ڈی وینس

واشنگٹن(مانیٹرنگ ڈیسک)امریکی نائب صدر جے ڈی وینس نے کہا ہے کہ امریکا اور ایران کے درمیان تکنیکی نوعیت کے مذاکرات بدستور جاری ہیں اور یہ رابطے پہلے سے جاری سفارتی عمل کے تسلسل کا حصہ ہیں۔

ایک انٹرویو میں جے ڈی وینس نے بتایا کہ واشنگٹن اور تہران کے درمیان تکنیکی سطح پر مختلف امور پر بات چیت جاری ہے، جس کا مقصد پہلے سے طے شدہ نکات پر پیش رفت کو آگے بڑھانا ہے۔

انہوں نے دوحہ میں ممکنہ مذاکرات سے متعلق ایران کی عوامی سطح پر تردید پر تبصرہ کرتے ہوئے کہا کہ ان کے نزدیک ایسے بیانات ایران کی مذاکراتی حکمتِ عملی کا حصہ ہیں، جسے انہوں نے ’’فارسی طرزِ مذاکرات‘‘ قرار دیا۔

امریکی نائب صدر نے واضح کیا کہ موجودہ تکنیکی مذاکرات کسی نئے مرحلے کا آغاز نہیں بلکہ جاری سفارتی عمل کا تسلسل ہیں، اور دونوں ممالک مختلف تکنیکی معاملات پر مسلسل رابطے میں ہیں۔

یہ بیان ایسے وقت میں سامنے آیا ہے جب حال ہی میں ایران کی وزارت خارجہ کے ترجمان اسماعیل بقائی نے کہا تھا کہ امریکا کے ساتھ کسی حتمی معاہدے کے لیے باضابطہ مذاکرات کا مرحلہ ابھی شروع نہیں ہوا، تاہم ایران نے اس ہفتے دوحہ میں مفاہمتی یادداشت پر عملدرآمد سے متعلق تکنیکی بات چیت کے لیے ایک ماہر وفد بھیجنے کی تصدیق کی ہے۔