عالمی منڈی میں سونے کی قیمتوں میں بڑا اضافہ

کراچی(جانوڈاٹ پی کے\ویب ڈیسک) امریکا اور ایران کے درمیان جنگ کے خاتمے اور ابتدائی امن معاہدے کی خبروں کے بعد عالمی مالیاتی منڈیوں میں غیر معمولی ردعمل دیکھنے میں آیا ہے، جہاں سونے کی قیمتوں میں نمایاں اضافہ ریکارڈ کیا گیا۔

رپورٹس کے مطابق پیر کے روز کاروبار کے آغاز پر عالمی مارکیٹ میں سپاٹ گولڈ کی قیمت 2.5 فیصد اضافے کے بعد 4,322.87 ڈالر فی اونس تک پہنچ گئی، جو حالیہ دنوں کی بلند ترین سطح قرار دی جا رہی ہے۔

اسی طرح امریکی فیوچرز مارکیٹ میں اگست ڈیلیوری کے لیے سونے کا بھاؤ بھی 2.5 فیصد اضافے کے ساتھ 4,344.80 ڈالر فی اونس ریکارڈ کیا گیا۔

معاشی ماہرین کے مطابق امریکا اور ایران کے درمیان کشیدگی میں کمی اور امن معاہدے کی پیش رفت کے بعد امریکی ڈالر دباؤ کا شکار ہوا، جس کے نتیجے میں سونا دیگر کرنسیوں کے حامل سرمایہ کاروں کے لیے نسبتاً سستا اور زیادہ پرکشش بن گیا۔

ماہرین کا کہنا ہے کہ عالمی سرمایہ کار غیر یقینی معاشی حالات میں سونے کو محفوظ سرمایہ کاری تصور کرتے ہیں، اسی لیے اہم سفارتی اور معاشی تبدیلیوں کا اثر فوری طور پر قیمتی دھاتوں کی مارکیٹ پر نظر آتا ہے۔