دبئی کے ایمریٹس فنانشل ٹاورز میں آتشزدگی، چند منٹوں میں آگ پر قابو پا لیا گیا
دبئی (ویب ڈیسک)ایمریٹس فنانشل ٹاور کی بالائی منزل پر لگنے والی آگ پر فوری کارروائی کرتے ہوئے قابو پا لیا گیا، جس کے باعث کسی بڑے نقصان یا جانی نقصان سے بچاؤ ممکن ہو سکا۔
خلیجی میڈیا رپورٹس کے مطابق دبئی پولیس، سول ڈیفنس اور امدادی ٹیمیں اطلاع ملتے ہی موقع پر پہنچ گئیں اور چند منٹوں کے اندر آگ بجھا دی گئی۔ حکام کے مطابق عمارت کی وہ منزل جہاں آگ لگی، اس وقت مرمت اور تزئین و آرائش کے کام سے گزر رہی تھی۔
اماراتی حکام کا کہنا ہے کہ واقعے میں کسی قسم کے جانی نقصان کی اطلاع موصول نہیں ہوئی، جبکہ عمارت کو احتیاطی طور پر خالی کرایا گیا تھا۔
آگ لگنے کی اصل وجہ تاحال سامنے نہیں آ سکی، تاہم متعلقہ اداروں نے واقعے کی تحقیقات شروع کر دی ہیں تاکہ آتشزدگی کے محرکات کا تعین کیا جا سکے۔
یہ عمارت دبئی کے مصروف ترین کاروباری علاقے شیخ زاید روڈ پر واقع ہے اور اہم مالیاتی و تجارتی دفاتر کا مرکز سمجھی جاتی ہے۔
