دو سال پرانے قتل کیس کا فیصلہ، قاتل کو سزائے موت سنادی گئی
دیپال پور(محمد اسلم بھٹی\جانوڈاٹ پی کے) ایڈیشنل سیشن جج دیپال پور ریاض افضل نے دو سال قبل اراضی تنازع پر ہونے والے قتل کے مقدمے کا فیصلہ سناتے ہوئے مجرم کو سزائے موت کا حکم دے دیا۔
عدالتی فیصلے کے مطابق جرم ثابت ہونے پر مجرم عبدالرشید عرف طاہری کو سزائے موت اور 5 لاکھ روپے جرمانے کی سزا سنائی گئی۔
استغاثہ کے مطابق دو سال قبل گاؤں بھومن شاہ میں زمین کے تنازع پر ملزم نے فائرنگ کرکے اپنے ہم نام عبدالرشید کو قتل کر دیا تھا۔ مقتول کی بیوہ ارم بی بی کی مدعیت میں مقدمہ تھانہ صدر دیپال پور میں درج کیا گیا تھا۔
عدالت نے شواہد اور گواہوں کی روشنی میں جرم ثابت ہونے پر ملزم کے خلاف فیصلہ سنایا، جس کے بعد مقتول کے اہلخانہ نے فیصلے پر اطمینان کا اظہار کیا۔
یہ فیصلہ اراضی تنازعات سے جڑے سنگین جرائم کے خلاف قانون کی عملداری کا ایک اہم مظہر قرار دیا جا رہا ہے۔
