پاکستان موسمیاتی آفات کے خلاف جدوجہد میں رہنما کردار ادا کرسکتا ہے، صدر زرداری
اسلام آباد (جانوڈاٹ پی کے) صدر مملکت آصف علی زرداری نے کہا ہے کہ پاکستان موسمیاتی آفات کے خلاف جدوجہد میں محض متاثرہ ملک نہیں بلکہ عالمی سطح پر رہنما کردار بھی ادا کرسکتا ہے۔ اس مقصد کے لیے قومی اور بین الاقوامی اداروں کو آفات سے نمٹنے کی پیشگی تیاری اور مؤثر منصوبہ بندی کو اپنی سرگرمیوں کا بنیادی حصہ بنانا ہوگا۔
قدرتی آفات کے خطرات میں کمی کے عالمی دن کے موقع پر اپنے پیغام میں صدر مملکت نے کہا کہ یہ دن پاکستان کے لیے خصوصی اہمیت رکھتا ہے۔ قدرتی آفات سے حاصل ہونے والے تجربات نے واضح کیا ہے کہ صرف آفت آنے کے بعد اقدامات کرنا کافی نہیں، بلکہ جانی و مالی نقصانات کم کرنے کے لیے پیشگی تیاری اور مؤثر منصوبہ بندی ناگزیر ہے۔
آصف علی زرداری نے کہا کہ پاکستان کے قومی نظام برائے قدرتی آفات سے نمٹنے کے اداروں نے خطرات کی پیشگی نشاندہی کے لیے قابل ذکر کام کیا ہے۔ انہوں نے زور دیا کہ مقامی آبادیاں اور مقامی حکومتیں قدرتی آفات کے خلاف دفاع کی پہلی صف ہیں، اس لیے ان کی صلاحیتوں کو مضبوط بنانا وقت کی اہم ضرورت ہے۔
صدر مملکت نے قدرتی آفات کے خطرات میں کمی کے لیے علاقائی تعاون کو فروغ دینے پر بھی زور دیا۔ ان کا کہنا تھا کہ خطے کے ممالک کو مشترکہ خطرات سے نمٹنے کے لیے مل کر کام کرنا چاہیے اور قبل از وقت انتباہ سے متعلق معلومات سرحدوں کے پار فوری طور پر پہنچانے کا مؤثر نظام قائم ہونا چاہیے، تاکہ ممکنہ نقصانات کو کم کیا جاسکے۔
انہوں نے کہا کہ پاکستان سیلاب، زلزلوں، شدید گرمی کی لہروں اور خشک سالی جیسے سنگین چیلنجز کا سامنا کرچکا ہے۔ قدرتی آفات نہ صرف انسانی جانوں اور گھروں کو نقصان پہنچاتی ہیں بلکہ لوگوں کی امیدوں اور معاشی مستقبل کو بھی متاثر کرتی ہیں۔
صدر آصف علی زرداری نے مشترکہ دریاؤں اور قدرتی آفات سے وابستہ مشترکہ خطرات کے حوالے سے وسیع تر بین الاقوامی تعاون کی ضرورت پر زور دیتے ہوئے کہا کہ باہمی اشتراک، بروقت معلومات کے تبادلے اور پیشگی تیاری کے ذریعے آفات کے تباہ کن اثرات اور نقصانات میں نمایاں کمی لائی جاسکتی ہے۔
