دورہ سری لنکا کیلئے قومی ٹیم کے سکواڈ کا اعلان جلد متوقع

لاہور(جانوڈاٹ پی کے) پاکستان کرکٹ ٹیم کے دورہ سری لنکا کے لیے ٹی 20 سکواڈ کا اعلان جلد متوقع ہے۔

ذرائع کا کہنا ہے کہ ٹی 20 میچز کی سیریز کے لیے سکواڈ کے لیے مشاورتی عمل جاری ہے، آل راؤنڈر شاداب خان سری لنکا کے خلاف سیریز میں شامل ہوں گے۔

ذرائع کے مطابق سکواڈ میں فاسٹ بولر حارث رؤف کے نام پر بھی غور کیا جارہا ہے، حارث رؤف جنوبی افریقہ اور ٹرائی سیریز کے لیے سکواڈ کا حصہ نہیں تھے۔

ذرائع کے مطابق ٹی 20 میں نوجوان کرکٹر معاذ صداقت کو بھی موقع دیئے جانے کا امکان ہے، فاسٹ بولر احمد دانیال کی بھی سکواڈ میں شمولیت کا امکان ہے جبکہ کچھ کرکٹرز بی بی ایل میں شرکت جاری رکھیں گے۔

پاکستان اور سری لنکا کے درمیان ٹی 20 سیریز کے 3 میچز 7، 9 اور 11 جنوری کو کھیلے جائیں گے۔

واضح رہے کہ ٹی 20 ورلڈ کپ کے لیے ابتدائی سکواڈ جمع کرانے کی ڈیڈ لائن 7 جنوری ہے، ورلڈ کپ کے انعقاد سے ایک ہفتہ قبل آئی سی سی کی اجازت سے ٹیم میں ردو بدل کیا جا سکتا ہے، ٹی 20 ورلڈ کپ 7 فروری سے 8 مارچ تک بھارت اور سری لنکا میں کھیلا جائے گا۔