سہ ملکی سیریز: سری لنکا کی کرکٹ ٹیم پاکستان پہنچ گئی

اسلام آباد(جانوڈاٹ پی کے)ٹرائنگولر سیریز کے لئے سری لنکا کی کرکٹ ٹیم چریتھ اسالنکا کی قیادت میں پاکستان پہنچ گئی۔پاکستان کرکٹ بورڈ کے حکام نے نیو اسلام آباد ائیر پورٹ پر مہمان ٹیم کا خیر مقدم کیا۔

سری لنکا کی ٹیم پاکستان میں تین ون ڈے انٹرنیشنل میچوں کی سیریز کے لیے آئی ہے، جو 11 سے 15 نومبر تک راولپنڈی کرکٹ سٹیڈیم میں کھیلی جائے گی۔

ان تین ون ڈے میچز کے بعد، پاکستان کرکٹ بورڈ (پی سی بی) نے ایک اور دلچسپ سیریز کا اعلان کیا ہے۔

17 نومبر سے شروع ہونے والی ٹی ٹوئنٹی ٹرائنگولر سیریز میں پاکستان، زمبابوے اور سری لنکا کی ٹیمیں مدمقابل ہوں گی۔ یہ ٹورنامنٹ راولپنڈی اور لاہور کے کرکٹ میدانوں میں 29 نومبر تک کھیلا جائے گا۔

سیریز کی تیاریوں کے حوالے سے پاکستان کرکٹ بورڈ کا کہنا ہے کہ یہ میچز نہ صرف کرکٹ کے شائقین کے لیے ایک شاندار موقع ہوں گے بلکہ پاکستان اور سری لنکا کے درمیان کرکٹ کے روابط کو مزید مستحکم کریں گے۔