انگلینڈنے10کھلاڑیوں والی چیک ریپبلک کو2-0سے شکست دے دی

لندن (جانو ڈاٹ پی کے)انتھونی گورڈن اور ہیری کین کے گولز کی بدولت انگلینڈ نے نیشنز لیگ کے میچ میں 10 کھلاڑیوں پر مشتمل چیک ریپبلک کو 2-0 سے شکست دے دی۔

میچ کے 25ویں منٹ میں چیک ریپبلک کو بڑا دھچکا اس وقت لگا جب لیون کے مڈفیلڈر پاول شولٹس کو انگلینڈ کے ایلیٹ اینڈرسن کے خلاف خطرناک ٹیکل پر پہلے یلو کارڈ دکھایا گیا، تاہم وی اے آر جائزے کے بعد ریفری نے فیصلہ تبدیل کرتے ہوئے انہیں براہ راست ریڈ کارڈ دے دیا۔

ایک کھلاڑی کم ہونے کے باوجود چیک ریپبلک نے پہلے ہاف میں انگلینڈ کو گول کرنے سے روکے رکھا۔ انگلش ٹیم کو متعدد مواقع ملے لیکن وہ انہیں گول میں تبدیل نہ کرسکی۔

دوسرے ہاف کے آغاز میں انگلینڈ کو کامیابی حاصل ہوئی جب انتھونی گورڈن نے ٹرینٹ الیگزینڈر آرنلڈ کے شاندار کراس پر ہیڈر کے ذریعے گیند کو جال میں پہنچا کر ٹیم کو 1-0 کی برتری دلادی۔میچ کے درمیانی حصے میں انگلینڈ نے ایک مرتبہ پھر حملہ کیا اور ہیری کین نے باکس کے اندر ملنے والے موقع سے فائدہ اٹھاتے ہوئے گیند کو گول میں پہنچا دیا، یوں انگلینڈ کی برتری 2-0 ہوگئی۔انتھونی گورڈن کا انگلینڈ کی جانب سے یہ مسلسل تین میچز میں تیسرا گول ہے، جبکہ ہیری کین اس سے قبل اسپین کے خلاف بھی انگلینڈ کے لیے گول اسکور کرچکے ہیں۔انگلینڈ نے 2-0 کی برتری آخر تک برقرار رکھتے ہوئے نیشنز لیگ کے میچ میں کامیابی حاصل کرلی۔