دوسرا ٹیسٹ: ویسٹ انڈیز کو پاکستان پر 60 رنز کی برتری، میچ فیصلہ کن مرحلے میں داخل

پورٹ آف سپین(ویب ڈیسک) ویسٹ انڈیز نے دوسرے اور سیریز کے آخری ٹیسٹ میچ کے تیسرے روز اپنی دوسری اننگز میں 6 وکٹوں کے نقصان پر 103 رنز بنا کر پاکستان کے خلاف مجموعی طور پر 60 رنز کی برتری حاصل کر لی، جس کے بعد میچ دلچسپ مرحلے میں داخل ہو گیا ہے۔

اس سے قبل ویسٹ انڈیز کی پہلی اننگز 344 رنز پر ختم ہوئی تھی، جس کے جواب میں پاکستان نے 387 رنز بنا کر 43 رنز کی برتری حاصل کی۔

تیسرے روز پاکستان نے 266 رنز 2 کھلاڑی آؤٹ سے اپنی پہلی اننگز دوبارہ شروع کی۔ کپتان بابر اعظم 88 رنز بنا کر رن آؤٹ ہوئے، جبکہ ڈیبیو کرنے والے اویس ظفر ایک، سلمان علی آغا صفر اور محمد رضوان 18 رنز بنا کر پویلین لوٹ گئے۔

عبداللہ شفیق نے شاندار بیٹنگ کا مظاہرہ کرتے ہوئے ناقابلِ شکست 160 رنز کی اننگز کھیلی، جبکہ ساجد خان نے 30 اور علی عثمان نے 10 رنز بنائے۔ عبید شاہ اور محمد علی بغیر کوئی رن بنائے آؤٹ ہوئے، یوں پاکستان کی پوری ٹیم 387 رنز پر ڈھیر ہو گئی۔

ویسٹ انڈیز کی دوسری اننگز میں پاکستانی باؤلرز نے عمدہ آغاز کرتے ہوئے میزبان ٹیم کے ابتدائی بلے بازوں کو زیادہ دیر وکٹ پر نہ ٹھہرنے دیا۔ تاہم تیسرے روز کے اختتام تک ویسٹ انڈیز نے 6 وکٹوں کے نقصان پر 103 رنز بنا لیے اور پاکستان پر مجموعی طور پر 60 رنز کی برتری حاصل کر لی۔

اب میچ کے آخری روز دونوں ٹیموں کے درمیان کامیابی کے لیے سخت مقابلے کی توقع کی جا رہی ہے۔