ملک کے بالائی علاقوں میں برفباری کا سلسلہ تھم گیا، سردی میں اضافہ، نظام زندگی مفلوج ، ریسکیو آپریشن جاری
پشاور(جانوڈاٹ پی کے)ملک کے بالائی علاقوں میں برف باری کا سلسلہ تھم گیا۔
گزشتہ کئی روز سے وقفے وقفے سے جاری برفباری کے باعث سردی کی شدت میں اضافہ ہوگیا،کشمیر، گلگت بلتستان، خیبر پختونخوا اور بلوچستان کے مختلف مقامات پر کئی کئی فٹ برف موجود ہے جس کے باعث رابطہ سڑکیں بند ہیں۔
اپر ہزارہ ڈویژن کے تمام اضلاع میں ریسکیو آپریشن جاری ہے، کاغان شہر تک سڑک کلیئر کردی گئی ، شوگران میں پھنسے سیاحوں کو ریسکیو کرلیا گیا۔
کالام، ملم جبہ اور گبین جبہ میں برف ہٹانے کا عمل جاری ہے، لوئر دیر اور کرم میں بھی ریسکیو اینڈ ریلیف آپریشن جاری ہے، برف میں پھنسی متعدد گاڑیوں کو محفوظ مقامات پر منتقل کردیا گیا۔
ادھر استور میں برف باری کے بعد نظام زندگی مفلوج ہوگیا، استور ویلی روڈ بحال نہیں ہوسکا، ہنزہ میں زلزلہ متاثرہ علاقے چیپورسن میں تیز ہواؤں اور سردی سے متاثرین کو مشکلات میں اضافہ ہوا ہے جس کے باعث متاثرین دیگر علاقوں میں منتقل ہوگئے۔
شمالی بلوچستان اور بالائی سرحدی علاقوں میں سائبیرین ہواؤں کے باعث ریکارڈ توڑ سردی سے معمولاتِ زندگی شدید متاثر ہوگئے۔
دوسری جانب خیبر پختونخوا اور بلوچستان میں آج سے بارشوں اور برف باری کے نئے سلسلے کی پیش گوئی کی گئی ہے۔
